Zisatheleka izivakashi emabhishi eThekwini
ZISAQHUBEKA nokuthutheleka eThekwini izivakashi njengoba sekuyizinsuku zokugcina zamaholidi.
Iphini lenhloko yezokuxhumana kuMasipala weTheku, uMnuz Mandla Nsele, lithe kusukela ngoJanuwari 1 kuya ku-7 nonyaka babalelwa ku-462 480 abantu abavakashele amabhishi akuleli dolobha nezinye izindawo eziseThekwini.
Kuhlengwe abantu abangu-98, kwanikwa usizo oluphuthumayo abantu abangu-7 926 iningi labo ebebencinzwe ama-blue bottles.
Zingaphezulu kuka-91 205 izingane ezinikwe amabhande abenemininingwane yazo. Zibalelwa ku-286 izingane ezidukelane nabazali bazo noma nabantu ebezihamba nabo kodwa babuye bahlanganiswa. Umfana oneminyaka engu-11 waseVryheid uhlale endaweni egcina izingane ezidukelene nabazali bazo izinsuku ezimbili ngemuva kokuthi itekisi ayefike ngalo lamshiya.
Lo mfana ugcine ehlanganisiwe nomndeni wakhe.
NgoDisemba 31, kwaminza indoda emfuleni uMkhomazi ngesikhathi isikebhe eyayihamba ngaso sizika, kulesi sehlo kwahlengwa ingane eneminyaka emithathu.
NgoJanuwari 6 kuminze indoda eLa Mercy.
IPhini likaSihlalo wekomidi ebelibhekelele uhlelo lwamaholidi, uMnuz Malcolm Canham, lithe njengoba sekusele izinsuku ezimbalwa aphele amaholidi bafisa ukuqinisekisa amalungu omphakathi ukuthi zonke izinhlelo zabo zokwenza isiqiniseko sokuthi baphephile zikhona kuze kudlule lesi sikhathi.
“Amaphoyisa azolokhu ebonakala ukwenza isiqiniseko sokuthi izivakashi nabahambele kuleli dolobha baphephile futhi bazijabulisa ngendlela ehlelekile. Abagada ababhukudayo, abagada izingane emabhishi bazoba sebhishi ukuze baqinisekise ukuthi bayatholakala uma bedingeka.”
Uthe abasebenzi abangeziwe abebeqashwe ngesikhathi samaholidi bazogcina emsebenzini ngoMsombuluko.