Ngeke kube lula ukuhlwitha umnotho kwabamhlophe
SIKHULA NGOMNOTHO
ABAMHLOPHE bahamba phambili uma kukhulunywa ngamabhizinisi, ukutshalwa kwemali nokuphathwa kwezimboni nezakhiwo ezinkulu. Ngisho nasezikhundleni nasemaholweni abamhlophe basahamba phambili. Ucwaningo lwakamuva lubeka amaphesenti angu90 omnotho ezandleni zabamhlophe lapha eNingizimu Afrika. Lokhu kusho ukuthi yingcosana ephethe umnotho njengoba ingevile ku-10% wabamhlophe lapha ezweni.
Yilesi simo esesisuse umsindo kwezepolitiki njengoba amaqembu eseqhakambisa inkululeko kwezomnotho. Nezinhlelo zikahulumeni zibonakala zigxile ekubuyiseleni umnotho kwababecindezelwe phambilini. Kuyakhuthazake ukubona izinhlaka ezahlukene zisukumela indaba yomnotho wabamnyama kodwa kufanele samukele ukuthi ngeke kube lula. Iqiniso wukuthi ngeke bavume abamhlophe ukuhlwithwa iqatha emlonyeni.
Okunye okufanele kucace wukuthi yize uhulumeni eshaya umthetho kodwa ukutshalwa kwemali kuncike kwabamhlophe abaphethe umnotho. Ngisho imali ephuma kubatshali zimali bamanye amazwe, iningi layo liphethwe yibona abamhlophe. Yize izinhlelo nezinhloso zikahulumeni zizinhle kodwa kuncane angakwenza ukuqinisekisa ukuthi umnotho ubuyela kwabamnyama. Imithetho evuna amabhizinisi abamnyama yisiqalo esihle kodwa kuningi okufanele osomabhizinisi abamnyama bakwenze ukuze babe semathubeni angcono okuncintisana nabamhlophe. Ngaphandle nje kwemali yokuqala nokuqhuba ibhizinisi kudingeka ukuthi sifinyelele ezimakethe ngaphakathi ezweni nasemhlabeni wonkana. Nazo lezi zimakethe ziphethwe abamhlophe. Okunye okubalulekile wubudlelwane namabhizinisi akuphakela imikhiqizo nezinsiza zokuqhuba ibhizinisi lakho. Impumelelo incike kakhulu kulobu budlelwane. Kuyacaca ukuthi ngeke kusisize ukuklolodela abamhlophe sicabange ukuthi sizowuthatha kalula umnotho. Kunalokho kufanele sibheke amathuba okusebenzisana nabo ukuze sizicije ngolwazi silungiselela ikusasa. Kulokhu kusebenzisana kufanele siye ngenhloso yokufunda ukuze ngokuhamba kwesikhathi ubudlelwane buvune thina. Ngeke kube lula njengoba nabo abamhlophe kulindeleke ukuthi babhekele uhlangothi lwabo. Yilokhu okwenza uhlelo lweBEE luhluleke ukubuyisela umnotho ebantwini. Abamhlophe badinga ukusebenzisana nathi kanti nathi siyabadinga ukuze sincele ulwazi abanalo.
Akuwona nje amabhizinisi kuphela kodwa nokutshalwa kwemali kwenganyelwe futhi kwaziwa yibona abamhlophe. Yize bekhona abamnyama abengamele ukutshalwa kwemali kodwa isibalo sabo sincane kakhulu. Ngokunjalo bambalwa abamnyama abanolwazi ngokutshala imali ezindaweni ezifana neJSE. Lokhu kusho ukuthi yinde indlela okusafanele siyihambe ukuze sibe negxathu elibonakalayo kwezomnotho.Yebo sinazo izizathu zokusala emuva kangaka kodwa iqiniso wukuthi akekho umuntu ozosihola kufanele sivuke sizithathe. Akusisizi ukubeka yonke into emahlombe kahulumeni kufanele sishintshe ukwenza sizihluphe ngomnotho wethu.
Kuyimanje kunenkulumo evuthwayo ngokubuyiselwa komhlaba ebantwini. Umbuzo uthi sikulungele yini ukusebenzisa umhlaba sikhiqize ukudla sizakhele umnotho? Ngeke yini sibone abantu sebewudayisela ezinye izinhlanga umhlaba sigcine sibuyela emuva? Kuyiqiniso ukuthi umhlaba uwumcebo kodwa akwanele ukuba wumnikazi womhlaba kufanele siwusebenze. Ukulima ezingeni lokuhweba kudinga imali nezimakethe zokudayisa umkhiqizo.
Njengoba osopolitiki bekhuluma eyokubuyisela umnotho kubantu kufanele sizicije ukuze athi efika amathuba sibe sime ngomumo. Kumele sikhulise abantwana abanomqondo wamabhizinisi kunokubacijela ukuyofuna umsebenzi. Umnotho akube enye yezindaba esizixoxa eziko, ezikoleni nasezimbizweni. Uma singenzi kanjalo kufanele sikwamukele ukuthi yiphupho ukuphatha umnotho.
Akulula ukuphatha umnotho, ukuqhuba ibhizinisi nokutshala imali ngempumelelo. Uma sinenhloso ngekusasa kufanele sibhukule sifundisane ngomnotho. . Asifunde ngokutshala imali ngoba akuyena wonke umuntu onomqondo nesibindi sokuvula ibhizinisi. Esingekuphike wukuthi lolu lwazi lugcwele kubona abamhlophe, kuyosizake ukuthi singabavaleli ngaphandle. Nalapho kufanele siluhluze ulwazi esilutholayo seneliseke ukuthi luphusile. Lokho singakwenza ngokuxoxa ngalo, siluphicaphice sibuze imibuzo ukuze siqiniseke ukuthi wulwazi olunohlonze.
Akukho ukusonga izandla silindele imana evela eZulwini, ebhizinisini kukheth’ukhethi.
Sishayele ku-031 829 5820. Sithinte kule email address mfundoa@gmail. com. Thumela uWhatsApp ku-083 354 8794 ujoyine UbuntuWealth group. Hheshe!