Bebesophe inkunzi bebanjwa nezibhamu
KUBOSHWE abasolwa abathathu ehostela laKwaMashu, eThekwini abatholwe nezibhamu ezingekho emthethweni ngeSonto.
Okhulumela amaphoyisa KwaZuluNatal uLt Colonel Thulani Zwane uthe laba basolwa baboshwe ngemuva kokuthi amaphoyisa ethole ulwazi lokuthi kukhona abahlela ukubamba inkunzi eNanda.
Uthe amaphoyisa abe esebheka abasolwa abavimba bengakayibambi inkunzi.
“Abasolwa batholwe nezibhamu ezintathu nezinhlamvu.” Kwesinye isigameko kuboshwe abasolwa ababili abatholwe nezibhamu ngesikhathi kunomkhankaso wokulwa nobugebengu obuwenziwe ngamaphoyisa ophiko lwezinja oLundi, abaseshi basoLundi namaphoyisa ophiko lokulwa nobugebengu. UZwane uthe amaphoyisa abe nomkhankaso oLundi Plaza wokulwa nobugebengu ezinxanxatheleni zezitolo. “Ngesikhathi amaphoyisa enza umsebenzi wawo abone abantu abasolisayo kule ndawo abe eseyabamisa. Laba basolwa baseshiwe batholwa nezibhamu ezimbili nezinhlamvu okungekho emthethweni,” kusho uZwane.
Uthe kuyasolwa ukuthi bebeya kokwenza ubugebengu.
Abasolwa bobabili abaneminyaka engu-24 no-39 babekwe amacala okutholwa nezibhamu nezinhlamvu okungekho emthethweni.
UZwane uthe izibhamu ezitholwe kubasolwa zizoyohlolwa ukuze kubhekwe ukuthi azikaze yini zenze amanye amacala esifundazweni.
Ukhomishana wamaphoyisa osabambile esifundazweni uMajor General Bheki Langa uncome amaphoyisa ngokubopha abasolwa nokuthola izibhamu ezingekho emthethweni. “Amaphoyisa asaqhubeka nomkhankaso wamaholidi esifundazweni futhi siyayibona imiphumela selokhu iqalile le mikhankaso,” kusho uLanga. Uthe abasolwa ababoshiwe bazobhekwa ukuthi bangobani ukuze kutholakale ukuthi abathinteki yini kwamanye amacala.