Okushaqisayo ngabahlinzwa ezikhungweni ezise-Afrika
IZIGULI ezihlinziwe ezikhungweni zezempilo e-Afrika zisengozini yokushona.
Lokhu kuvezwe wucwaningo olwenziwe yiNyuvesi yaseCape Town olubheka ukuthi kwenzekani ngemuva kokuthi iziguli zihlinziwe ezikhungweni zezempilo e-Afrika, i-African Surgical Outcomes Study (ASOS).
Lolu cwaningo olwenziwe ngo2016 lwashicilelwa emqingweni wezempilo, iThe Lancet, luqale ukutholakala kwi-internet ngoLwesihlanu oludlule.
Ucwaningo luveza ukuthi iziguli eziningi ezihlinzwayo e-Afrika ngabantu abasebancane abasuke bephila kahle kodwa ngemuva kokuhlinzwa babhekana nezinkinga bese u-2% wabo uyashona.
Uma kuqhathaniswa lezi zibalo namanye amazwe emhlabeni, ukushona kweziguli ezihlinziwe e-Afrika kuphindaphindwe kabili.
U-1% weziguli ezihlinziwe ezishona ngemuva kokuhlinzwa emhlabeni.
USolwazi uBruce Biccard wophiko lwezitubamizwa, i-Anaesthesia & Perioperrative Medicine obuye asebenze esibhedlela iGroote Schuur, ongumbhali obhale ulwazi oluningi ngalolu cwaningo, uthe: “Ulwazi olunjengalolu phambilini belungacacisi kahle, ukushicilelwa kwe-ASOS kusinikeza ulwazi olusikhombisa ukuthi zingakanani izinselelo emkhakheni wokuhlinzwa nokuthi kumele sizithuthukisephi.”
Kukholakala ukuthi bangu5 billion abantu abangakwazi ukuthola usizo lokuhlinzwa ezikhungweni zezempilo emhlabeni kanti u-95% wabo usemazweni anabantu abaningi abahola kancane.
USolwazi uBiccard uthe yize kubalulekile ukuthi iziguli zithole usizo lokuhlinzwa kodwa okubaluleke kakhulu wukuthi ukuhlinza kuphephe.
Ngokwe-ASOS iningi leziguli lishona ngemuva kokuhlinzwa.
“Lokhu kusitshela ukuthi kumele sibe nendlela yokubona iziguli ezisengcupheni zinakekelwe ngokuyikho. Uma singaqaphela lokhu ukuhlinzwa kungaba yindlela yokwelapha ephephile e-Afrika,” kusho uSolwazi uBiccard.
Ucwaningo luveza ukuthi u-95% weziguli ushona ngemuva kosuku uphuma kohlinzwa.
Kuvele ukuthi imbangela yokushona kweziguli kuba wukuthi ingqalasizinda yesikhungo ezihlinzwe kuso ayinazo izinsiza ezisezingeni elifanele lokunakekela iziguli.
Ucwaningo lwenziwa ezigulini ezingu-11 422 ezihlinzwe ezibhedlela ezingu-247 e-Afrika.
Kulolu cwaningo kuphinde kuvezwe ukuthi isibhedlela ngasinye kulezi sisebenzisa ziphi izinsiza zokunakekela iziguli ezihlinziwe.
Kulezi zinsiza kubhekwa ukuthi mingaki imibhede esemagunjini agcina iziguli ezihlinziwe nokuthi injani, ongoti abanakekela iziguli bangaki, bafunde ziphi izifundo, isipiliyoni sabo singakanani, bangaki abasebenzi abalekelelayo kulelo gumbi, umsebenzi ngamunye ugada iziguli ezingaki nokuthi izitubamizwa ezisetshenziswayo ziyinhloboni.