Uncame ukushiya kunokuqhinqa ebhentshini
UNCAMELE ukushiya kunokukhuhla ibhentshi uDove Wome obegijima kwiSuperSport United.
UWome uqinisekisile ukuthi usehlukene naleli qembu lasePitoli ngoba umqeqeshi u-Eric Tinkler ukubeke kwacaca ukuthi ngeke ayivuselele inkontileka yakhe uma kuphela isizini.
Njengamanje imenenja kaWome, uMichael Ngobeni we-M-Sports-Management, itshele Isolezwe ukuthi lo mdlali imzamela umsebenzi e-Azarbaijan.
Exoxa naleli phephandaba uWome udalule okwenze wacela ukuthi akhululwe kwiSuperSport.
“Umqeqeshi ungitshele emehlweni ukuthi ngeke ayivuselele inkontileka yami uma isiphela ngoJuni. Ngibone ukuthi kungcono ngihambe manje ngoba kuyacaca ukuthi angikho ezinhlelweni zakhe. Kusizani ukuhlala eqenjini obona kahle ukuthi awemukelekile kulona?
Angifuni ukuqamba amanga iSuperSport ingiphathe kahle kodwa umqeqeshi ubengasithandi isitayela sami. Ebholeni kunjaloke, omunye umqeqeshi uyayithanda indlela odlala ngayo, kufike omunye uthole ukuthi akayifuni,” kusho uWome.
UWome ubebolekiswe kwiOrlando Pirates ngomzuliswano wesibili ngesizini edlule.
“Uma ubheka isikhathi esiningi bengidlala uma sigijima kwiCAF Confederation Cup. Ngemuva kweCAF ngiqalile ngahlala ebhentshini. Nokho ngeke ngikhulume kabi ngo-Eric ngoba ungumqeqeshi oseqophelweni eliphezulu. Ukuthi akasithandi isitayela sami akusho ukuthi sekumele ngimbambele igqubu,” kusho uWome.
UWome uke wamataniswa neCape Town City esanda kulahlekelwa ngabadlali abamqoka. Leli qembu lihlukane noLehlohonolo “Major” Majoro no-Aubrey Ngoma.
“Okwamanje ngisajima ngedwa. Sihlukane kamnandi neSuperSport futhi imenenja yami imatasa izama ukungitholela ikhaya elisha. Indaba yase-Azerbaijan yinto imenenja yami esayihlanganisa.
Okwamanje akukabi yinto eqondile. Uma sihluleka sizozama lapha eNingizimu Afrika,” kusho uWome.
Namuhla iSuperSport izobhekana neBidvest Wits, eBidvest Stadium, ngo-7.30 ebusuku.