U-Amanda usethi khumu kwiBanyana
UKUHLALA unyaka engabizelwa eqenjini lesizwe yisona isizathu esiqinise isinqumo sika-Amanda “Toki” Dlamini sokuthi athi khumu ekudlaleleni iBanyana Banyana.
Izindaba zokuhoxa kukaDlamini ekudlaleleni iqembu lesizwe zivele izolo ntambama. Lokhu kwenzeke ngemuva kokuthi umqeqeshi obambile weBanyana, uDesiree Ellis, emfake esikwatini sabadlali abangu-26 abazoqala ikhempu ngeSonto belungiselela imidlalo yobungani neSweden engoJanuwari 18 no-21 kuleli.
UDlamini (29) odabuka eHarding, KwaZuluNatal, waqala ukubizelwa eqenjini lesizwe ngo-2007 edlala kwiDurban Ladies. UDlamini ubengabonwa nangokhalo nangesikhathi iBanyana idla isicoco seCosafa Cup nyakenye.
Wayegcine ukudlala kumaOlympic eBrazil ngo-2016.
“Ngifisa ukubonga iSafa nabo bonke abaqeqeshi abangisizile nangethuba lokuthi ngidlalele iqembu lesizwe. Lokhu kunginike nethuba lokushintsha impilo yami ngisho nangaphandle kwenkundla.
Ngokudlala ibhola nokubizelwa eqenjini lesizwe ngikwazile ukufunda, kwavuleka namanye amathuba. Ngibonile ukuthi sengathi angisabizwa, ngabona ukuthi ngigxile kwezinye izinto,” kusho uDlamini.
UneDiploma yeRoad Transport Management ayithole e-University of Johannesburg nayo abengumdlali wayo. Ukugcizelele ukuthi akayekile ukudlala ibhola njengoba esazoyibamba eqenjini lakhe elidlala kwiGauteng Sasol League, iJVW. Uzophinde agxile emsebenzini wakhe wokuhlaziya ibhola esiteshini sethelevishini, iSuperSport nasekuthuleni izinkulumo ezakhayo.
Lo mdlali owayengukaputeni ngesikhathi iBanyana iya okokuqala kuma-Olympic, eLondon ngo-2012 ubesenemidlalo engu-105 kwelesizwe.
Uthe ulifisela impumelelo iqembu kwazise mkhulu umsebenzi olihlalele kulo nyaka.
“Bengifisa ukuthi nginqobe i-AWC (African Women Championship) nokuthi ngidlale kwiNdebe yoMhlaba kodwa lokho sekufana nephupho. Ngifisela ozakwethu abasele impumelelo ngoba ngiyakholwa ukuthi sineqembu elinethalente elanele ukuya kwiNdebe yoMhlaba.
Abadlali abafana noThembi Kgatlana bayikusasa leqembu,” kusho uDlamini.
Abazaziyo bathi uDlamini ibingamphethe kahle indaba yokushaywa kwakhe ngesithende kwelesizwe, ikakhulukazi njengoba ubenganikwa isizathu salokho.
Umdlalo wokuqala wakhe kwelesizwe babebhekene neNigeria kowokuhlungela ama-Olympic ngo-2007. Washaya igoli lakhe lokuqala kwelesizwe bebhekene neNetherlands.
Unqobe indondo yesiliva neyethusi kwi-AWC ngo-2010 nango-2012. Waba ngumdlali wesihlanu wesifazane ukufika emidlalweni engu-100 kwelesizwe emuva kokudlala owobungani ne-USA ngo-2016.