Useyafuna ‘ukupaka ibhasi’ uPitso
KUBUKEKA sengathi ukushaywa kweMamelodi Sundowns kwakamuva sekwenze umqeqeshi wayo uPitso Mosimane washintsha umqondo ‘ngokupaka ibhasi’ ngesinye isikhathi okuyinto ahlale ethi akahambisani nayo.
Ngemuva komdlalo wezakhe nePolokwane City, lapho beshaywe khona ngo 3-2 uMosimane uzwakale ngemuva komdlalo ekhuluma into ebingalindelekile kuyena.
“Ngithe kubona okungcono noma bangabe besalishaya elinye igoli kodwa singangenelwa yigoli..,” kusho uMosimane ngemuva komdlalo.
Kusobala ukuthi uMosimane lapha ubeqonde ukuthi abadlali bakhe bekumele bavale emuva ukuze kungangeni igoli. Ngokuvamisile uMosimane uhlale ethi yena uthanda ukudlala namaqembu afana nePolokwane, Orlando Pirates neChippa United ngoba awalibali ukuhlala emuva kodwa ayahlasela umdlalo uze uphele. Kuyaxaka nokho ukuthi emdlalweni wokugcina ubesefisa nokuthi abadlali bakhe bavale emuva ukuze athole iwini ngoba ubebona ukuthi bayehluleka ukusebenzisa amathuba abebewathola.
ISundowns isishaywe imidlalo emibili ilandelana okwenze yahluleka ukuvula igebe esicongweni. Ivale u-2017 ngokushaywa yiCape Town City ngo 1-0 njengoba iRise and Shine iyishaye ngo 3-2 ngempelasonto. Bese kungokwesibili iPolokwane ishaya amaBrazillians kule sizini. Emzuliswaneni wokuqala yayishaya ngo 2-1. Kuyaphawuleka ukuthi kuyona yomibili le midlalo uRodney Ramagalela washaya amagoli okuwina, ahamba kanjalo amaphuzu ayisithupha. Izolo ebusuku iSundowns ibibhekene ne-Ajax Cape Town emdlalweni we-Absa Premiership eCape Town Stadium. NgoMgqibelo inomdlalo onzima lapho izodudulana ne-Orlando Pirates eLoftus Stadium, ePitoli, ngo3.30 ntambama.
Igcina ukuhlangana neBucs iSundowns iwine ngo 3-1 ngonyaka odlule. Nokho iPirates ezobhekana nayo ibukeka ihlukile kulokhu uma uMilutin Sredojevic engezolishintsha iqembu lakhe. EZimnyama ziwuqale kahle u-2018 zibhuquzisa iBaroka FC ngo 3-1 ngoMgqibelo.
Abadlali abafana noLuvuyo Memela (oshaye amagoli amabili), Musa Nyatama naye oshaye igoli noThabo Matlaba babukeka bengaba inkinga kwiSundowns ngoMgqibelo.
Nokho amaBrazillians ayaziwa ngokuhlale eyihlupha iPirates njengoba eke ayihlaza ngo 6-0 ngesizini edlule. Kuwona amaBrazillians kuzobhekwa uPercy Tau, Themba Zwane noHlompho Kekana ukuthi bahluphe udonga lweBucs.
Akwaziwake noma uMosimane uzoqhubeka yini nendlela yakhe yokuhlasela ngoMgqibelo ngoba nodonga lwakhe lubukeka lungaqinile kahle ngezinye izikhathi.
nKomunye umdlalo wePremiership namuhla iBidvest Wits izobhekana neSuperSport United eBidvest Stadium, eGoli, ngo-7.30 ebusuku. Womabili la maqembu izinto aziwahambeli kahle emidlalweni yeligi. IWits isendaweni yokugcina kwi-log kanti iSuperSport isendaweni ka-12, yize isalele emuva ngemidlalo.