NGABE SEKUYAPHELA NGOKOMPHELA KWI-CHIEFS?
I-KAIZER Chiefs isiqashe iTechnical Director entsha edabuka eHolland uRobertus ‘Rob’ Hutting. Amakhosi aqinisekise izindaba zokuqashwa kukaHutting izolo ntambama kwi-website nakwiTwitter. Ukulandwa kukaHutting waseHolland sekuqubule imibuzo ngekusasa likaSteve “Mphathi” Komphela izinto ezingamhambeli kahle.
Inkontileka kaKhomphela neChiefs iyaphela ngoJuni. Lo mqeqeshi uzohlanganisa isizini yesithathu ecija Amakhosi. Selokhu afika akakaze anqobe ngisho nesisodwa isicoco.
Ufinyelele kowamanqamu weTelkom Knockout nakwiMTN 8 ngesizini yakhe yokuqala. Kwifayineli yeMTN 8 ushaywe yi-Ajax Cape Town kwathi kwiTKO waguqiswa yiMamelodi Sundowns ngo 3-1.
Indlela iChiefs esukume ngayo kuleli windi icacisa bha ukuthi ikusasa likaKomphela liyacikizela kuMakhosi. UHutting uzalwa eHolland ngo-1955. Lolu qweqwe lo mqeqeshi luphethe i-UEFA Pro licence elwayithola eDutch National Boards. UHutting ushaya nangeDegree yePostacademical ayithola e-University Leuven eBelgium. Upheke amaqembu amaningi eBelgium, Holland naseGermany.
IChiefs ayizange icacise ukuthi uHutting usayine isikhathi esingakanani okungenzeka ukuthi ukumenyezelwa kwakhe ekubeni ngumqondisi wethimba labaqeqeshi kuMakhosi kwenzelwa ukuthi afunde isitayela seqembu bese ethatha umsebenzi ngesizini ezayo.
Amakhosi alanda uHutting nje asanda kusayinisa uSiphelele “Stashi” Ntshangase, Kabelo “Skipper” Mahlasela noLeonardo Castro. Kuyimanje Amakhosi awalilahlile ithemba ngoSinethemba Jantjie weFree State Stars noXola Mlambo weBidvest Wits. Isikhulu esiphezulu seWits uJose Ferreira sike sacashunwa kweminye imithombo yabezindaba siqinisekisa ukuthi iChiefs ike yamfuna uMlambo. Kule sizini iChiefs ivele isilahlekelwe yisicoco seMTN 8 neseTelkom Knockout. Isibhekene nese-Absa Premiership neNedbank Cup.