Kume ukusebenza e-Unisa kubhikishwa
KUMISIWE ukusebenza e-University of South Africa (Unisa) eThekwini emuva kombhikisho wezitshudeni zakulesi sikhungo obunodlame izolo.
Izitshudeni zakulesi sikhungo, zivale imigwaqo zikhala ngokuthi isikhwama esikhokhela izitshudeni iNational Student Financial Aid Scheme (NSFAS ) asibakhokhelile ngaleyo ndlela ayikho imiyalezo eqinisekisa ukuthi sezibhalisile kulesi sikhungo.
UNkk Jo Cossavela, okhulumela i-Unisa KwaZulu-Natal, uthe abaholi bezitshudeni kulesi ikhungo abazange bazitshele lutho ngezinkinga ababhekene nazo njengokujwayelekile bezwe ngezinye izitshudeni ukuthi zikhathazeke ngokuhamba kancane kohlelo lukaNSFAS.
UXolo Magutshwa, uMengameli weSasco, kulesi sikhungo uthe iningi lezitshudeni kulesi sikhungo azikayitholi imiyalezo eqinisekisa ukuthi zibhalisiwe.
“UNSFAS akakhokhile, ngesonto eledlule kufike isikhulu sayo uMnuz Steven Zwane wasitshela ukuthi uhlelo lwemfundo yamahhala luhamba kanjani. Uma sibuyela enyuvesi lokho esitshelwe kona kokuthi uma unencwadi eqinisekisa ukuthi uNSFAS uzokukhokhela uzobhaliswa mahhala akwenzeki.
Inqwaba yezitshudeni azibhalisiwe. NgoLwesihlanu ezinye zazo kumele zihambise ama-assignment okuqala. Lawo ma-assignment akuphendlela indlela yokuthi ubhale izivivinyo zakho. Wona futhi uNSFAS awusikhokheli isitshudeni esingaphasi kahle. Kumele senze njani uma kuyiwona ongasikhokheli bese siyafeyila?” Kubuza uMagutshwa.
Uthe bazoqhubeka nokumasha ezitaladini kuze kufike izikhulu zalesi sikhwama zizochaza kabanzi ukuthi kuzokwenziwa njani njengoba iningi lingakakhokhelwa.
Izitshudeni ebezicula ezinye zihleli phansi emgwaqweni zivimbele izimoto ezidlulayo zihlakazwe ngamaphoyisa.
UNkk Cossavella uthe ihhovisi elikwaZulu-Natal alizithathi izinqumo ngezinye izinto kodwa abaholi bezitshudeni baye bazidlulise izikhalo zabo kulo.
“Kulokhu kwenzeke okungajwayelekile sabona izitshudeni zihlangene ehholo maqede zaphuma bagcwala umgwaqo. Akukho ezisitshele kona ngokumasha kwazo. AbakwaNSFAS bazofika ngoLwesine bazochazela izitshudeni ngalesi sikhwama. Bakhona abasebenzi abasiza izitshudeni kulesi sikhungo kodwa kubuye kube nezingqinamba zokuthi amakhompyutha abuye angasebenzi. Lokho thina asikwazi ukukulungisa ngoba akuqondene nathi. Sithathe isinqumo sokuthi inyuvesi ivalwe kuze kufike bona,” kusho kanje.
Okhulumela amaphoyisa kulesi sifundazwe, uCol Thembeka Mbele, uthe kuboshwe izitshudeni ezintathu kulesi sikhungo.
“Zizovela eNkantolo yeMantshi eThekwini ngecala lokudala udlame emphakathini.”