Kufe 9 amaphoyisa edubulana nabasolwa
KUFE amadoda ayisishiyagalolunye adutshulwe eMpophomeni naseMariannhill ngesikhathi amaphoyisa etholana phezulu ngenhlamvu nabasolwa okuthiwa bebehlele ukuyobamba inkunzi eBulwer, izolo.
Lawa madoda okusolwa ukuthi ayizigebengu eziqhumisa imishini yemali zibambe nenkunzi kuthiwa zidutshulwe kulezi zindawo ngesikhathi amaphoyisa elandela umkhondo wazo.
Okhulumela amaphoyisa KwaZulu-Natal, uLt Colonel Thulani Zwane, uthe ngesikhathi amaphoyisa elandela umkhondo wezimoto obekuthiwa ziyobamba inkunzi, lezi zigebengu zibaleke ngomgwaqo uN3 ziza ngaseThekwini.
Ezinye ebezihamba ngezimoto ezimbili kuthiwa ziye ngaseMpophomeni kanti kuthiwa amaphoyisa athe azama ukuzimisa zaqala zadubula.
Uthe kule ndawo kusale enkundleni eziyisithupha kwalimala oyedwa.
UZwane uthe ngoba izigebengu bezihamba ngezimoto ezintathu, amaphoyisa aphinde alandela enye imoto ebihamba ezinye yona eficwe ngaseMariannhill Toll Plaza.
“Amaphoyisa azamile ukuyimisa nale moto kodwa abebekuyo badubula bebhekise emaphoyiseni. Amaphoyisa adubulile kwashona abathathu kwalimala oyedwa,” kuchaza uZwane.
Uthe amaphoyisa athole izibhamu ezinkulu ezindaweni zezigameko kodwa izolo ntambama bekungacaci ukuthi zingaki ngoba amaphoyisa abesematasa endaweni yesigameko.
UZwane uthe amaphoyisa aphenya amacala okuzama ukubulala, amacala ngokufa kwabasolwa nokutholwa kwezibhamu ezingekho emthethweni. Uthe enye yezimoto ebihamba abasolwa kutholwe ukuthi beyidunwe eThekwini. Uphiko oluphenya amacala athinta amaphoyisa kuthiwa lubikelwe ngalesi sigameko ukuze luphenye.
UKhomishana wamaphoyisa aKwaZulu-Natal osabambile uMajor General Bheki Langa ukugxekile ukuhlaselwa kwamaphoyisa wathi azoqhubeka nokusebenza kanzima ukulwa nobugebengu nokuqinisekisa ukuthi umphakathi uphephile.