Akucaci ukuthi ubehlanganeleni neMbube uMengameli uZuma
AKUCACI ukuthi ubumayelana nani umhlangano kaMengameli Jacob Zuma neSilo samaBandla uGoodwill Zwelithini esigodlweni sasoLundi izolo.
Lo mhlangano ububanjelwe ngasese, abezindaba bengavumelekile ukuthi babe yingxenye yawo.
UZuma ukwenkulu ingcindezi kulezi zinsuku njengoba kuthiwa kufanele ashenxe esikhundleni sakhe ngaphambi kokuthula inkulumo ebhekiswe esizweni ngoLwesine.
Okhulumela iNdlunkulu kaZulu, uMntwana Thulani Zulu, uthe noma engenaso isiqiniseko sokuthi ngubani ofune ukubona omunye kodwa angakuqinisekisa ukuthi uZuma uhlanganile neMbube.
UZulu uthe akekho emsebenzini usekhefini kodwa uzwile ngalo mhlangano. “
Anginaso isiqiniseko sokuthi bekukhulunywa ngani,” kusho uZulu.
Okhulumela uZuma, uDkt Bongani Ngqulunga, uthe umengameli uhlanganile neMbube.
“Umhlangano okwakufanele ngabe kade waba khona, kwakumele ube ngenyanga edlule kodwa wahlehliswa ngenxa yokuthi bebematasa.”
Kwenzeka lokhu nje i-EFF ithe izoya enkantolo uma i-ANC ike yaphumela obala ngokuthi ifuna uZuma ehle esikhundleni.
“Silinde nje ukuthi i-ANC isho ukuthi akehle bese siya enkantolo sifune isivimbelo sokuthi angakhulumi ngoba inhlangano yakhe ayisamfuni. Asikwazi ukuthi singalalela umuntu ongafunwa yiqembu lakhe,” kusho uMengameli we-EFF uMnuz Julius Malema esithangamini nabezindaba ekomkhulu lale nhlangano izolo.
UMalema uthe ngesikhathi beyitshela i-ANC ukuthi ayimkhombe indlela uZuma bathathwa njengabantu abafuna ukunyomfa izinto.
“Ngeke ibe khona inkulumo ebhekiswe esizweni, sifuna kuxoxwe indaba yokuthi uZuma ehle esikhundleni, ngoba asibuthembi ubuholi bakhe. Akukwazi ukuthi kungachithwa uR4 million ePhalamende kulalelwe umuntu ongafunwa,” kusho uMalema.
Uthe uZuma uyagoloza ukuphuma esikhundleni.