Owe-ANC uzinikele kwabomthetho
LISHONE elayizolo isizinikele emaphoyiseni indoda ebigcwele ezinkundleni zokuxhumana ikhahlela owesifazane obemashela eLuthuli House namalungu eBlack First Land First (BLF).
Imenenja yezokuXhumana kwi-ANC, uNkk Khusela Diko, ithe uThabiso Setona ugcine ezinikele emaphoyiseni wathi bayibonile i-video enaye bazoyidlulisela ebuholini obuphezulu ngoba akwamukelekile akwenzile.
“Abantu abashaya abanye bazothathelwa izinyathelo zomthetho, akukhathaleki ukuthi ushaye indoda noma owesifazane, kufanele ajeziswe. Amavideo azodluliselwa ebuholini obuphezulu ukuze abathintekayo baqondiswe ubugwegwe,” kusho uNkk Diko.
UMnuz Jolidee Matongo, okhulumela i-ANC eGoli, ukugxekile ukushaywa kowesifazane yilungu labo, athe linguNobhala wegatsha labo eliseZone 12.
Uthe okwenziwa nguSetona akwenziwa kwi-ANC, uzoqondisa ubugwegwe maduzane.
Amalungu eBLF agasele ekomkhulu le-ANC ehlose ukuqhinqa ngaphandle kwakhona ukuzozwakalisa ilaka lawo mayelana nakuchaze njengokuhlukunyezwa kukaMengameli Jacob Zuma obhekene nengcindezi yokuthi ehle esikhundleni sakhe ngaphambi kokuthi ethule inkulumo yesizwe ngoLwesine.
Amaphoyisa athwale kanzima izolo ezama ukukhuza amalungu e-ANC abevutha engabaselwe efuna ukuwadla luhlaza amalungu eBLF.
UNkk Diko uthe i-ANC iyalihlonipha ilungelo labantu lokuthi babhikishe, inqobo uma belandela umthetho.
UNkk Diko ukugxekile ukushaywa kwamalungu eBLF.
UMnuz Mkhululi White we-ANC eGauteng uthe abantu abebemasha ngaphandle kwaseLuthuli House babukela phansi ubuholi obukhona be-ANC.
UWhite uthe abaqondi ukuthi kungani amalungu eBLF emashela ekomkhulu le-ANC uma ekhuluma ngodaba lukaZuma. “UZuma akasesiye uMengameli we-ANC ngakho asikho isidingo sokuthi iBLF uma imasha ize eLuthuli.”
Uthe ngeke baze bavumele muntu ukuthi adelele inhlangano.
“Besingeke sithule sisonge izandla abantu bezosichukuluza,” kusho uWhite.
Ilungu leBLF, uNksz Thandiswa Yaph, lithe inhloso yokumasha eLuthuli House bekuwukuzokwethula izikhalo zabo bezothi akayekwe phansi uZuma.
UNksz Yaph uthe uZuma ukhishwa esikhundleni ngoba nakhu engumengameli obhekelela kakhulu abantu abamnyama.
“Ukukhishwa kukaMengameli Zuma kuzobuyisela emuva konke osekuzuzwe yizwe ekushintsheni impilo yomuntu omnyama,” kusho uNksz Yaph.