‘Sekulele kuZuma ngodaba lwakhe’
INGCABHA isele noMengameli Jacob Zuma ukuthi ehle esikhundleni noma aqhubeke nomsebenzi wakhe kuze kuphele unyaka ozayo.
Lokhu kuvezwe abahlaziyi bezepolitiki abathi uma egcina ngokuzisulela esikhundleni iPhini lakhe uMnuz Cyril Ramaphosa lizobamba ekuholeni izwe.
Abahlaziyi bathi uma igcina ifinyelela ePhalamende eyokungabuthembi ubuholi bakhe ekhishwa ngevoti kuyosho ukuthi iKhabhinethi izohlakazwa, ongqongqoshe namaphini abo balahlekelwe ngumsebenzi.
UMnuz Lukhona Mnguni, ofundisa eNyuvesi yaKwaZulu-Natal, uthe sekulele kuZuma ukuthi ehle noma angehli.
Uthe uma egcina ngokusula nguRamaphosa ozobamba.
“Uma ehla ngaphambi kokwethula inkulumo ebhekiswe esizweni ngoLwesine, nguRamaphosa ozothula inkulumo. Izinto zizoqhubeka kuze kuqokwe umengameli. Umengameli wamaJaji okumele anqume usuku ukuze kuvalwe isikhala kodwa zingakapheli izinsuku ezingu-30,” kusho uMnguni.
Uthe i-ANC izama ukuyibalekela eyokuthi kube nevoti lokungabuthembi ubuholi bukaZuma ngoba baningi abantu abayolahlekelwa yisinkwa.
Omunye umhlaziyi wezepolitiki, uMnuz Ralph Mathekga, uhambe emazwini kaMnguni wathi nguRamaphosa okumele abambe uma kusula uZuma. UMathekga uthe ayikho into evimba uRamaphosa ukuthi abambe esikhundleni sikaZuma uma esula.
Uthe uma uZuma engasuli, amaqembu aphikisayo azophakamisa ukungabuthembi ubuholi bakhe.
“Isiphakamiso sokungabethembi ubuholi bukaZuma sinomthelela omubi ngoba uma ehamba uhamba nabeqembu lakhe kwiKhabhinethi, ngeke uKhongolose uyivume leyo nto,” kusho uMathekga.
UMnguni uthe uma uRamaphosa engathandi ukubamba kungaqokwa omunye umuntu.