Akukuhle ukushayela uphatheke kabi
UKUHLULWA wukulawula imizwa ushayela kuyingozi njengokuthumela umqhafazo ushayela nokushayela uphuzile, ngokusho kocwaningo lwakamuva oluveza ukuthi abashayeli bangena emgwaqweni bephatheke kabi bese bedala izingozi noma bahlulwe wukulawula ulaka.
Ngokocwaningo lwenkampani yomshwalense, iDiscovery Insure, siphezulu isibalo sezigameko zokufa kwabantu emgwaqweni ezidalwa wukuhluleka wukulawula ulaka kubashayeli.
UMnuz Themba Baloyi, ongumqondisi kwaDiscovery Insure, uthe ukushayela ungaphathekile kahle kunomthelela ofanayo nokusebenzisa ucingo ushayela.
“Ukubhekana nesimo esingasihle ngokomoya ngesikhathi ushayela kungakuphazamisa okudlula ukusebenzisa ucingo ushayela,” kusho uBaloyi.
Uthe sebekwaze ukulandelela bathole ukuthi zingakanani izibalo zezigameko ezenzeka zidalwa abantu abasuke bephazamisekile. Izibalo zabo zikhombisa ukuthi u-10% wabashayeli abasuke beshayela bephazamisekile basethubeni elikhulu lokudala ingozi uma beqhathaniswa nabantu abasuke bengaphazamisekile.
Kulindelekile ukuthi uma umuntu ephatheke kabi aphazamiseke ekutheni enze izinto okulindeleke ukuthi azenze osukwini njengokusebenza nokuthatha izinqumo. Ngokusho kwemiphumela yocwaningo nasemgwaqweni kuba yinto efanayo.
Imiphumela iveza ukuthi ukuphatheka kabi, ukukhathazeka kakhulu, ukhwantalala nokujabula kakhulu konke kungaba nomthelela ekutheni umuntu athathe izinqumo ezingaholela ekudaleni ingozi noma ukuyivika.
Uma umuntu ezizwa engaphathekile kahle kungenzeka agcine eseshayela ngokunganaki futhi aphuze ukuthatha izinqumo ezingavikela yena nahamba nabo emgwaqweni.
UBaloyi uthe ukwehlisa umoya kungasiza ukugwema izigameko eziningi zodlame olwenzeka emgwaqweni.
“Ukwehlisa amazinga okhwantalala nokuzama ukucabanga imicabango eyakhayo kuyasiza ekutheni ukwazi ukubhekana nezimo zempilo. Okunye okubalulekile wukuzinika isikhathi esanele sokulala uvocavoce umzimba. Kuyasiza nokuzama ukuthola izindlela zokumelana nokucasuka nezinye izimo ezingadala ukuphazamiseka empilweni yonkana – kubaluleke kakhulu lokhu ukuze siqinisekise ukuphepha emgwaqweni,” kusho uBaloyi.
Nazi ezinye zezinto abathole ukuthi zingasiza abantu bangazitholi sebephazamiseka emoyeni uma beshayela nokungasiza ukugwema izigameko zodlame nezingozi emgwaqweni:
Hlela ukuphuma endlini kusenesikhathi. Ungaphumi usutatazela.
Ungalunaki ucingo nemiyalezo esuke ingena kulona uma usushayela.
Yehlisa umoya uma usushayela uzijwayeze nokuphefumulela phansi njalo emuva kwemizuzu embalwa.
Ungagxili emaphutheni enziwa abanye abashayeli emgwaqweni ngoba lokhu kungadala ukucasuka okungenasidingo.
Kubalulekile ukuzijwayeza ukucabangela abanye abashayeli uma usemgwaqweni.
Gwema ukugijima nokungena phambi kwabanye abashayeli ungazange ukhombise kusenesikhathi ukuthi ufuna ukungena. Lokhu okunye okuholela ezigamekweni zezingozi nezingxabano phakathi kwabashayeli,
Kungcono ukuma endaweni ephephile wehlise umoya uma kukhona into ekuphethe kabi kakhulu. Ukulalela umculo okujabulisayo nakho kuyasiza ekutheni umuntu ehlise umoya emgwaqweni.