Akusona isisombululo ukucekela phansi izitimela
INHLANGANO elawula ukusebenza kwezitimela, iPassenger Rail Agency of South Africa (Prasa), ithe ukusebenza kwezitimela kusengcupheni ngenxa yabantu abazicekela phansi.
Ukucekelwa phansi kwezitimela okwenzeka cishe mihla namalanga kudalela le nkampani izindleko njengoba ithe ngonyaka odlule igcine inyukile imali eyikhokhela izinkampani zomshwalense yafinyelela kuR78 million ngonyaka.
Ngesonto eledlule kushiswe izitimela ezimbili eThekwini. Ngonyaka wezimali ka-2016/17 kwacekelwa amakhoshi angabiza uR292 million.
Yizigidi ngezigidi zabantu ezithembela ezitimeleni nsuku zonke ukuya emsebenzini nasezikoleni. Abaningi bancamela zona ngenxa yokungalumeli kwazo ephaketheni futhi ziphephile uma ziqhathaniswa nezinye izinhlobo zokuthutha ngoba izingozi azivamile kangako kuzona.
Yize-ke kunjalo, kule minyaka edlule, izinga lokusebenza kwezitimela lehlile kanti nabantu bavame ukukhala ngokuthi asigcinwa isikhathi nokubaqhatha nabaqashi babo ngoba bafika emsebenzini isikhathi sokungena sesidlulile.
Ngaphandle kwezikhathi lapho kusuke kunenkinga ezwakalayo ngomzila othize, kuyaye kungacaci kahle ukuthi yini ebambezela izitimela nokuthi yini kwenzeke lokhu cishe zonke izinsuku.
Nokho-ke yize ikhona leyo nselelo kodwa akwamukelekile ukuziphatha kwabagibeli ngendlela abaziphatha ngayo njengoba abanye bekhombisa ilaka labo ngokushisa izitimela.
Ukucekela phansi impahla ngoba nakhu uthukuthele akushintshi lutho kunalokho kwenza isimo sibe sibi kakhulu ngoba inkinga usuke usuyibhebhezele.
Imali esetshenziswa nguPrasa kukhokhelwa umshwalense kulungiswa izitimela ingenza ezinye izinto ezinjengokuphucula imizila yezitimela, kwandiswe izitimela futhi kuphuculwe namaholo abasebenzi kwakhiwe namathuba amasha omsebenzi.
Kunalokho izinto zihlehlela emuva ngenxa yabantu abakhetha ukukhuluma ngodlame kunokuthi kuhlalwe phansi kuboniswane.
Kuningi okufanele iPrasa ikulungise ngendlela esebenza ngayo kodwa nabo abagibeli kumele baziphathe kahle ngoba kuningi okungamosheka uma zingahle zivalwe ngempela izitimela.