‘Sifuna ukuyiwina yonke imidlalo’
UKUDLALA ngokulingana imidlalo eminingi ngesizini edlule ngenye yezinto ezenzele phansi iKaizer Chiefs yagcina ingasiwinanga isicoco se-Absa Premiership.
Iqembu laseNaturena selivele lidlale imidlalo ewu-10 ngokulingana njengoba sekusele ewu-10 ukuthi kusongwe isizini ka-2017/2018. Lokhu kwenza ukuthi lisalele emuva ngamaphuzu ayisikhombisa kwiMamelodi Sundowns eseqhulwini.
IChiefs idlale imidlalo ewu11 ngokulingana ngesizini edlule yaqeda endaweni yesine ngamaphuzu awu-50. EzikaSteve Komphela zingaqeda zinamaphuzu awu-61 uma zingayiwina yonke imidlalo esele kodwa mancane amathuba okuthi kwenzeke lokho uma kubhekwa ukuthi ziyehluleka ukuwina imidlalo emihlanu ilandelana.
Ngempelasonto iChiefs idlale ngokulingana ngo 1-1 neBidvest Wits etabalasela ukushesha ibaleke endaweni yezembe kwi-log yePremiership. Amakhosi abekade ebekwe phambili nguRyan Moon ngesiwombe sokuqala kodwa avumela uLehlohonolo Majoro ukuthi ashaye elokulinganisa, into ecike uKomphela.
Nakuba iChiefs ikade yayigcina induku kodwa ukudlala ngokulingana yikhona okuyenzela phansi. Ibhekane neWits ikade idlale ngokulingana ngo 0-0 neMamelodi Sundowns eFNB Stadium.
UKomphela uthe benze okwanele ukuwina umdlalo.
“Kunamathuba amabili esiwatholile engicabanga ukuthi bekufanele siwine ngawo umdlalo. Elitholwe nguNtshangase (Siphelele) nelitholwe nguCastro (Leonardo). Kukhona igoli elishaywe nguJayiya ( Bhongolethu) engekho emhlabeni ongafanele kodwa angazi kade sekwenzekeni ngoNtshangase ngaphambi kwalokho,” kusho uKomphela. “Siwatholile amathuba okuwina umdlalo. Siwudedelile? Yebo ngoba asibhekananga kahle nebhola ebeligotshiwe futhi bekunezikhathi lapho besizihuqela khona ubuthongo bangempela. Besingajeziswa. Ngicabanga ukuthi elinye lamaqembu bekufanele liwuwine lo mdlalo. Kuthi angithi silahle amaphuzu lapha. Ukuthi bazoligoba ibhola besazi, ukuthi kufanele uhlale ukulindele ukumaka ebhokisini besikwazi. Kodwa sihlulekile ukwenza lokho. Vimba ukuthi angagotshwa amabhola, uma uhluleka bhekana nawo ebhokisini. UMajoro ungqofe ibhola engamakwe muntu, silalile.”
Amakhosi asendaweni yesine kwi-log ngamaphuzu awu-31 emuva kwemidlalo ewu-20. Asele ngamaphuzu ayikhombisa kwiSundowns ezihola phambili ngawu-38. Nakuba amaqembu alandela iSundowns ekhombisa ukuba nomfutho kodwa ukulahla kwawo amaphuzu kungenzeka kuholele ekutheni amaBrazilians ayiwine iligi.
“Umdlalo odlalwe ngokulingana kwiChiefs ufana nokwehlulwa, kubuhlungu ngisho kunokulahlekelwa amaphuzu amathathu. Sifuna ukuyiwina yonke imidlalo. Bekufanele sithole amaphuzu amathathu. Kodwa kuseyimidlalo emibili (kulandelana). Angifuni ukwenza ihaba kodwa uma uwubuka umdlalo, bekufanele siwuwine. Besifuna ukugcina igebe lingamaphuzu ayisihlanu. Miningi imidlalo, kufanele silwe. Kodwa siliyekile ithuba. Manje ayisikhombisa amaphuzu esisele ngawo, asiqhubeke sibone kodwa siyazisola ukuthi asiwuwinanga lo mdlalo,” kusho uKomphela.