USelbeyonce woKhozi uzolingisa kwi-soapie
ISILOMO somsakazi woKhozi FM esizakhele udumo ngendlela esethula ngayo uhlelo lwantambama iWoza Nabangani Bakho siqophe umlando ngokuba ngumsakazi wokuqala kulo msakazo ukulingisa kwiGenerations: Legacy.
USelby “Selbeyonce” Mkhize sekuvele izindaba zokuthi useqalile ukuqopha kulo mdlalo.
Umthombo uthe abadidiyeli bawo bachazwe yindlela uSelby ayiyona.
“Ukuhlale enomdlandla futhi enza umsebenzi wakhe ngokuzimisela yikhona okumtholele indawo kulo mdlalo. Ujabulile impela yena njengoba lokhu kusho lukhulu kuyena,” kuchaza umthombo.
Omunye umthombo uthe uSelby useyela emaphethelweni okuqopha indawo azoyilingisa kulo mdlalo.
“Khona ngeke kube yisikhathi eside ekulo mdlalo. Ukuqopha uqale emasontweni adlule kodwa engingakutshela khona nje ukuthi indawo azoyilingisa izothandwa abaningi,” kuchaza umthombo. Uthe uSelby lokhu ukuthatha njengokukhula emkhakheni akuwo futhi ujabulile ngokuthola ithuba lokuba yingxenye yemidlalo emikhulu ewuchungechunge kuleli. The
Okhulumela umdlalo iGenerations, uGaaratwe Mokhethi, uvumile ukuthi uSelby usezobonakala kulo mdlalo.
“Kukhona iziqephu alandelwe zona ukuthi azozilingisa nezizohambisana nenye indaba kulo mdlalo ezobonakala sebeyilingisa. Ngeke sisho okwamanje ukuthi lolu daba lumayelana nani,” kuchaza yena.
Imizamo yokuthola uSelby mayelana nalolu daba ayiphumelelanga njengoba ucingo lwakhe belukhala lungabanjwa.
Kwenzeka lokhu nje uSelby ungomunye wosaziwayo abasanda kuvela kuZalo emngcwabeni kaMaNzuza noSmangele.