Ithuba entsheni ethanda ezengqephu
IZOTHOLA ithuba eliyingqayizivele intsha ekwezengqephu ngokuqala kohlelo olusha iProject Runway olukhombisa abathungi bengqephu beqhudelana ngezinto ezehlukene.
INdalo Pictures, inkampani kasomabhizinisi wesifazane osezakhele udumo, uKhanyi Dhlomo, ithole amalungelo okusazaka uhlelo kuMzansi Magic (161) kusuka ngoJulayi.
Kuzothi ngoFebhuwari 26, uMzansi Magic, ukhiphe imininingwane yokuthi abafuna ukuhlanganyela ohlelweni bangalandela miphi imigudu.
UKhanyi uthe iNingizimu Afrika inabantu abanamakhono amaningi ahlukene kwezengqephu, akangabazi ukuthi okubonakala ohlelweni lwaseUSA kuncane kunokuzobonakala kolwalapha.
“Wuhlelo oluhlomisa ngolwazi futhi oluyajabulisayo. Lukhombisa ithalente, abaningi bazokwakheka yilo. Sijabule ukuthi sithole ithuba lokulukhombisa,” kusho uKhanyi.
Uthe banethemba lokuthi abantu bazolujabulela.
Obhekelele izinhlelo kuMzansi Magic, uReneilwe Sema, uthe uhlelo lwenze kahle kakhulu phesheya kwezilwandle, ngakho bajabule ukuthi seluze lwafika nalapha.
“Njengesiteshi, ziningi izinhlelo esinazo ezijabulise abalandeli bethu. Ngakho nalo lolu asingabazi ukuthi bazolujabulela ababukeli bezinhlelo zethu,” kusho uReneilwe.