Umculi kwelokutholakala nezibhamu
UVELE phambi kweNkantolo yeMantshi yasePalm Ridge, eGermiston, izolo umculi kamaskandi uBukelani “Dlubheke” Khuzwayo emuva kokutholakala nezibhamu ehostela laseGoli iBuyafuthi ngoMgqibelo.
Lo mculi wodumo lwengoma esihloko sithi Impi Yamatekisi uboshwe ngamaphoyisa asesiteshini saseKatlehong.
Ngokusho kokhulumela amaphoyisa asesiteshini samaphoyisa iKatlehong, eGoli, uCaptain Mega Ndobe, uKhuzwayo ubingelele imantshi maqede wadedelwa ngenxa yokungatholakali kobufakazi.
“Sibophe uBukelani Nxumalo (okuyigama langempela likaDlubheke nesibongo sakoninalume) noKwenza Sithole. Amacala abebhekene noDlubheke ahoxisiwe maqede wadedelwa kwathi uSithole waqhubeka nokugqunywa esitokisini uzophinde avele ngoJuni 4,” kusho uNdobe.
Umthombo ohlala ehostela futhi osondelene noDlubheke ukuqinisekisile ukuthi uDlubheke ubiza uNxumalo ngenxa yokuthi unina akashadanga noyise futhi uyise ubiza isibongo sakwaMhayise hhayi esakwaKhuzwayo njengoba kwaziwa kanjalo.
Omunye umthombo ukuqinisekisile ukuthi nguDlubheke oboshiwe.
UNdobe uthe uDlubheke uboshwe esevenini eyi-ISUZU eBlock A eBuyafuthi. Baficwe nezibhamu maqede bakhalelwa ngamasongo kaSigonyela, bayogqunywa esitokisini saseKatlehong eGoli.
Uthe uDlubheke (24), wakwaNgqulu, eNquthu, ubedlala nabangani bakhe ngalesi sibhamu kanti kukhona ozohlebela amaphoyisa, base beboshwa kanjalo.
Imizamo yokuthola uDlubheke ayiphumelelanga ngenxa yokuthi izingcingo zakhe zombili bezingangeni futhi zingayemukeli imiyalezo.
UDlubheke uboshwe ematasatasa eqopha i-albhamu yeqembu lakhe, Amanguni Amahle, okulindeleke ukuba iphume ngePhasika.
Ngonyaka odlule wathusa abantu abaningi elaxaza inkampani kayise, Izingane Zoma Music wajoyina eyezimbangi, Ukhozi Media.
Ufike lapho wakhipha i-albhamu esihloko sithi Kwazondimbuka, okuyingoma ahlambalaza ngayo uzakwabo uKhuzani kodwa edume ngenoni elithi Impi Yamatekisi.