U-Atul Gupta uphika ekaR10m ngamaphepha awafake enkantolo
NGESIKHATHI oKlebe bematasa befuna uMnuz Ajay Gupta ngamacala enkohlakalo nokushushumbisa imali, umfowabo uMnuz Atul Gupta ufake amaphepha enkantolo esho ukuthi akazani noR10 million okuthiwa wangena kwi-akhawunti yakhe usuka epulazini i-Estina.
Kuvela ukuthi amaphepha akhe uwasayine ngoFebhuwari 8 eseDubai kanti ufuna i-Asset Forfeiture Unit (AFU) iyeke ukudla impahla yakhe.
Emakhasini angu-18 afakwe enkantolo, u-Atul uthe akekho eNingizimu Afrika futhi ufuna uMqondisi wokuShushiswa koMphakathi, u-Adv Shaun Abrahams, ahoxise icala ambeke lona.
Uthe kukhohliswe inkantolo ukuze kudliwe impahla yakhe.
Uthe akakaze athole uR10 million futhi akakaze ahlomule ngalutho epulazini lobisi i-Estina.
“Amaphepha ami abhalwe ngishesha ngoba ngixakwa yizinto ezenzekayo. Anginankinga nokuthathwa kwempahla kodwa angifuni kuthiwe ngahlomula emalini yepulazi enguR220 million,” kusho u-Atul.
AbezokuShushiswa koMphakathi bamise ukusebenza kwepulazi eVrede, eFree State, yamisa ukusebenza kwama-akhawunti abakwaGupta, awezinkampani zabo nakaDuzuzane, indodana yobenguMengameli wezwe, uMnuz Jacob Zuma.
Ekuqaleni konyaka kuvele ukuthi uMnyango wezoLimo eFree State, owawuphethwe nguMnuz Mosebenzi Zwane osenguNgqongqoshe wezokuMbiwayo, wakhokha uR220 million kwi-akhawunti yabakwaGupta.
U-Atul uthe umphenyi we-AFU, uMnuz Nkosiphendule Mradla no-Abrahams abanabo ubufakazi bokuthi uR220 million owakhokhelwa ipulazi lase-Estina wafakwa kwi-akhawunti yakhe.
“Ngiyayichitha imibiko yokuthi kunemali eyafakwa kwi-akhawunti yami noma kweyenkampani yami. Ukube lokhu kucacile ngabe ijaji alivumanga ukuthi kuthathwe impahla yami,” kusho u-Atul.