Bakhethe uxolo kwaphinde kwafundwa futhi esikoleni
KUBUYELE esimeni esijwayelekile ukufunda eSikhethuxolo High, eHammarsdale, okuphazamiseke emuva kokuthi ingxenye yaso nezindlu zothisha kushisiwe.
Izolo abafundi babuyele esikoleni emuva kwesonto sivaliwe.
Lokhu kungenxa yokushiswa kwezikole nezindlu zothisha ababili.
Ngesonto eledlule othisha, amalungu esigungu esilawula isikole, izikhulu zoMnyango wezeMfundo nezinye izinhlaka zomphakathi kuhlangane ehholo laKwaMagaba kuyodingida izinkinga zesikole. Emhlanganweni kwavunyelwana ngokuthi ukufunda kuqale izolo.
Ilungu lesigungu esilawula isikole, uMnuz Dumisani Moyo, uthe ukufunda kubuyele esimeni izolo. Uthe bekukhona isigungu esilawula isikole, abazali, iziphathimandla zoMnyango wezeMfundo, amaphoyisa bezoqinisekisa ukuthi usuku lokuqala luhamba ngendlela.
“Kuqalile ukufunda futhi kuhambe kahle kakhulu ngosuku lokuqala. Besifikile nabazali abaphumelelile, amaphoyisa neziphathimandla zoMnyango wezeMfundo sizoqapha isimo. Sijabule kakhulu ngendlela izinto ezihambe ngayo. Sivumelene ngokuthi sizolokhu sifika esikoleni kulo lonke leli sonto,” kusho uMoyo.
Uthe kube nomhlangano ngeSonto obekukhona kuwo abazali nothisha bezingane. Kubikelwe abazali ngezinqumo ezathathwa emhlanganweni owawungoLwesithathu oludlule.
Kulowo mhlangano kwavela ukuthi kunokungenami kubazali mayelana nokufeyila kwezingane zabo. Kwaphinde kwavela ukuthi abazali bebecasulwe wukungafiki kothisha emhlanganweni owawubizwe ngoFebhruwari 11 lapho okwakulindeleke ukuthi kubhungwe indaba yokufeyila kwezingane.
UMoyo uthe umhlangano wangeSonto uhambe kahle kwaxoxwa kahle phakathi kothisha nabazali.
Omunye wabazali, ocele ukuthi igama lakhe ligodlwe, uthe bakujabulele ukubuyela kwezingane esikoleni. Uthe banethemba lokuthi isimo sizoqhubeka sihambe kahle kusukela manje.