Usinde edutshulwa ozalwa nomholi we-IFP obulewe
USINDE ngokulambisa umfowabo womholi we-IFP eWeenen odutshulwe ngentululwane yezinhlamvu, ngoLwesihlanu.
UMnuz Mthoko Sithole (29) ongumfowabo kaMnuz Sphiwe Mbho Sithole obulawe ngoFebhuwari 4, eduze kwaseWeenen Combined Secondary, ubesendleleni eya ekhaya ngesikhathi ehlaselwa ngamadoda angaziwa.
UCaptain Nqobile Gwala, wamaphoyisa KwaZulu-Natal, uthe uSithole ubehamba ngomgwaqo uR74 ebheke eWeenen ngesikhathi ezwa kuqhuma isibhamu.
“Owesilisa uveze ukuthi emuva kokuzwa umsindo wokuqhuma kwesibhamu ubone sekufe iwindi langemuva lemoto yakhe wanyusa isivinini. Ngenhlanhla akazange alimale. Amaphoyisa aseWeenen aphenya icala lokuzama ukubulala,” kusho uCaptain Gwala.
USithole uveze ukuthi ukudutshulwa kwakhe kuhlangene nepolitiki ngoba bathole ukuthi kunohlu lwabaholi abathathu okuthiwa kufanele bafe eWeenen.
“Emasontweni amabili ngaphambi kokuthi umfowethu abulawe wasinda edutshulwa. Sithole ukuthi kunabantu abafuna ukusoconga yena, mina noVilakazi naye ongumholi we-IFP. Inkinga wukuthi thina sikolunye uhlangothi kanti kukhona olunye olufuna ukuphatha,” kusho uSithole ocele amaphoyisa nobuholi obuphezulu be-IFP ukuthi bungenelele kulolu daba.
Uthe babewavulile amacala ngaphambi kokushona kukamfowabo kodwa akukaboshwa muntu njengoba bengakatholakali ababulali bakamfowabo nalabo abazame ukusoconga yena.
UCaptain Gwala uthe kuyiqiniso ukuthi kwakuvulwe amacala okuzama ukubulala engakashoni umfowabo kaSithole kodwa akekho umuntu oseboshiwe ngawo. Ucele abanolwazi ngalezi zigameko ukuthi bathinte amaphoyisa aseduze nabo ukuze kuboshwe izigebengu noma bashayele iCrime Stop ku-08600 10111.
USihlalo kazwelonke we-IFP, uMnuz Blessed Gwala, uthe bekungaba kuhle ukuthi ukhomishana wamaphoyisa abheke eWeenen noma kube khona uphiko oluyisipesheli oluzobheka izibhamu eWeenen nokugijinyiswa kwabantu ngezibhamu emini kule ndawo.
“Ngibona kuthulekile ngasemaphoyiseni, ngeke sibhule ukuthi isizathu siyini ngoba asibona abaphenyi bamacala, yikho siyaye sibheke ngasemaphoyiseni bese sinxusa umphakathi ukuthi uwasize ngemininingwane. Siwabona eyihlabe inhlali ngendaba yaseWeenen. Lokhu kwenza kube lukhuni satshe ukuthi silandele udaba lwakhona,” kusho uGwala.
Uthe indlela ababona ngayo kuyasho ukuthi kukhona into ekhona kodwa abazi ukuthi bazoyilandela kanjani njengoba amaphoyisa engabophi muntu.