Uphelele engozini yeveni egingqikile
KUSHONE oyedwa kwalimala ababili ngesikhathi kugingqika iveni emgwaqweni uN3 eduze kwasePavilion, eWestville izolo. Okhulumela abakwa-ER24, uMnuz Russel Meiring, uthe bafike endaweni yesehlakalo nenye inkampani yabezimo eziphuthumayo bathola iveni ilele ngokhakhayi. Omunye obeyigibele utholwe engaphakathi, omunye ezulazula ngaphandle.
UMeiring uthe bathole ukuthi kunendoda ebilimele kanzima ebingasakhombisi izimpawu zokuthi isaphila.
“Ngebhadi akukho ebesingayenzela kona ibisivele ishonile,” kusho uMeiring.
Uthe owesibili obelimele utholwe engaphakathi emotweni kanti ulekelelwe wakhishwa. Ababili abalimele baphuthunyiswe esibhedlela. UMeiring uthe amaphoyisa abesendaweni yesigameko ukuze aphenye ngengozi.
Khonamanjalo kulimale abantu abane ezingozini ezimbili ezehlukene emgwaqweni uN3, ngeSonto lapho uchezukela khona kuPeter Brown eMgungundlovu.
UMeiring uthe bafike endaweni yesigameko sokuqala nabezinye izinkampani zabezimo eziphuthumayo bafica indoda ivaleleke elolini ebigingqike yayophonseka onqenqemeni lomgwaqo.
Uthe bayihlole bathola ukuthi ilimele kanti ibe isikhishwa ngezindlawu elolini. UMeiring uthe ngesikhathi besasiza le ndoda kwenzeke enye ingozi kuyo le ndawo kushayisana izimoto ezincane ezimbili. Kulimale abathathu kule ngozi.
Bonke abalimele bayiswe esibhedlela. Uthe amaphoyisa abekhona ukuze aphenye ngalezi zingozi.