Bazovela enkantolo ‘ababulale badlwengula’
KULINDELEKE ukuthi bavele kuleli sonto enkantolo abasolwa ababili ababhekene necala lokubulala owesifazane isidumbu sakhe esitholwe sinenqwaba yamanxeba okugwazwa e-Albert Wessels Drive, eNewcastle ngoMgqibelo.
Okhulumela amaphoyisa esifundazweni, uCaptain Nqobile Gwala uthe isidumbu salo wesifazane oneminyaka elinganiselwa kwengu-35 sitholwe yilungu lomphakathi esigangeni labe selithinta amaphoyisa.
Uthe ngesikhathi efika amaphoyisa lapho kutholwe khona isidumbu asithole sinqunu kwesingezansi sinenqwaba yamanxeba okugwazwa. Kuthiwa abalelwa ku-14 amanxeba lo wesifazane abegwazwe wona. Ngesikhathi amaphoyisa eqhubeka nophenyo lwawo luwaholele emijondolo yaKwaMatakuza lapho egasele khona ezindlini ezimbili. UCaptain Gwala uthe ngesikhathi ebheka kulezi zindlu, kutholwe ummese okusolwa ukuthi yiwona osetshenzisiwe ngesikhathi kwenziwa icala. Kuphinde kwatholwa nezimpahla zikamgilwa.
UCaptain Gwala uthe kuboshwe abasolwa ababili abaneminyaka engu-20 no-25 ngaleli cala. Laba basolwa kulindeleke ukuthi bavele enkantolo yeMantshi eNewcastle kuleli sonto ngecala lokubulala, ukubamba inkunzi nokudlwengula. Uthe isidumbu sizohlolwa ukuze kubhekwe ukuthi lo wesifazane akadlwengulwanga yini.
Ibamba lomkhuzi wamaphoyisa, uMajor General Bheki Langa uncome amaphoyisa ngokubopha ngokushesha kuleli cala elinesihluku sokubulawa komuntu wesifazane ongakwazi ukuzivikela.
Isolezwe lithole ukuthi eduze kwesidumbu sikamgilwa kuficwe ibhodlela likabhiya nemali oR20 ababili kanti kusolwa ukuthi uhudulwe emgwaqweni owubhuqu wafakwa ehlathini lapho ebulawelwe khona.