Abanankinga nekhomishini eSARS
INHLANGANO eqoqa intela kuleli iSouth African Revenue Service (SARS) ithe iyasamukela isinqumo sikaMengameli Cyril Ramaphosa sokusungula ikhomishini ezophenya ngokuqoqwa kwentela nezokuphatha kule nhlangano.
Esitatimendeni esithunyelwe kwabezindaba, iSARS iveze ukuthi akukho okungalungile ekwenzayo njengoba ilandela imithetho kahulumeni yokuqoqwa kwentela nokweseka intuthuko yezwe.
“Sizimisele ukusebenzisana nekhomishini ezophenya ngokwenzeka eSARS. Silindele ukuzwa ukuthi yiziphi izinhlaka ezizobhekwa. Uphenyo luzosiza abasebenzi bakwaSARS nabaholi bayo ukuthi babheke ukuthi yiziphi izindawo okufanele benze ngcono kuzo,” kusho iSARS esitatimendeni.
AbakwaSARS bathe bazophinde bacacise ukuthi bayinhlangano ewenza kahle umsebenzi bacacise nemibiko engcolisa igama lenhlangano evame ukuphuma kwabezindaba.
Bathe kulo nyaka bafuna ukungenisa ngaphezu kukaR1.214 trillion, okuyisikalo esasibekwe kwisabelomali sika-Okthoba wonyaka odlule.
Bathe bonke abasebenzi abangu-14 000 okuhlanganisa nabaphathi bazimisele ukwenza umsebenzi ongcono base becela wonke umuntu okufanele akhokhe intela ukuthi akwenze lokho.
Baphethe ngokugqugquzela abantu ukuthi bakhokhe intela nge-eFiling, basebenzise nezinye izinhlelo ezifana ne-mobi-site nama-app akumaselula noma bavakashele izikhungo zakwaSARS eziseduze nabo.