Awahlonishwe amakhasimende osomatekisi
AMARENKI amatekisi awaziwa ngenhlanzeko ngenxa yokuthi abanye abantu balahla udoti phansi yize imigqomo ikhona futhi abanye bakhetha ukuchamela izindonga zezakhiwo ezikulezi zindawo yize amathoyilethi ekhona.
Nakuba bekhona abantu abenza kanjena emarenki amatekisi kodwa lokho akusho ukuthi kufanele asheshe avalwe amathoyilethi khona yize abantu besekhona.
Isikhalo sosomatekisi baserenki yaseNanda ngaseMakethe eThekwini sokuthi izindlu ezincane kule ndawo zisheshe zivalwe yize olayini besuke besebade siyezwakala.
Iyanyayeka indlela le ndawo esiyiyona ngenxa yokuthi abantu baphoqeleka ukuthi bazikhulule obala ngoba amathoyilethi asuke esevaliwe.
Lesi senzo asenzi nje indawo ibukeke futhi inuke kabi kodwa siphazamisa nabantu abaziphilisa ngokudayisa ukudla erenki ngoba bambalwa abantu abangathenga ukudla endaweni engcolile, enuka umchamo futhi ephihlika indle.
Phakathi nezinsuku emarenki olayini babantu baba bade kuze kube yisebusuku ngenxa yaamatekisi alayisha kuze kube ngo-8 ebusuku kanti amanye alayisha kuze kube wu-9.
Ngisho noma ngabe bekuthiwa akudayiswa ukudla kodwa ngoba yindawo esetshenziswa umphakathi kufanele kubhekelelwe ukuthi izidingo zomphakath zikhona ngaso sonke isikhathi.
Kuyezwakala nokushiwo nguMasipala waseThekwini ukuthi amathoyilethi avalwa ngexa yokuphepha nokuthi isivumelwano umkhandlu onaso nosomatekisi wukuthi irenki ivalwa ngo-6 ntambama. Nokho-ke iqiniso wukuthi ngo-6 ntambama kusuke kusaphithizela kakhulu erenki ukuthi kungathiwa sekuzovalwa ngoba abanye abantu baxhuma amatekisi amaningi ngaphambi kokufinyelela emakhaya.
Kuyadingeka ukuthi umkhandlu nosomatekisi bahlale phansi babonisane futhi ngalesi sikhathi bese kubhekwa nokuthi ayikho yini indlela yokuthi kube nabaqaphi emarenki ebusuku ukuze umphakathi usebenzise amathoyilethi kahle.
Osomatekisi nabadayisa emarenki bangosomabhizinisi abadinga ukuxhaswa futhi namakhasimende abo kufanele ahlonishwe nendawo ihlonipheke.