Wayeyihlabe esikhonkosini uMadlokovu ngeyamaNdiya
Thubelihle Machi EHARDING Okhathazekile EMLAZA MHLELI: Bayaye bathi abaziyo izwi lomfokazana lizwakala kamuva. Ngiyaxolisa kokungase kwenzeke kungehli kamnandi engizokusho. Ngenkathi kusaphethe uDkt Nelson Mandela kwafika umyalezo ngomlomo weciko lakwaNgema, uMbongeni Ngema, elathi size sibabhekisise laba bantu abangamaNdiya ngoba abaqede kulunga. Wayeze ababize ngamagama abanye abaholi bezombusazwe ebuza ukuthi bathule bathini izinto zonakala bekhona.Yavalwa leyo ngoma kaMadlokovu ngoba kuthiwa izodala uhlevane.
Ngokubona kwami wukuthi isexwayiso saqhamuka kumuntu esingathi akalutho. Kwala ngisho sebememeza nkalo zonke kumagumbi omane omhlaba ababevumelana neqiniso likaMadlokovu ukuthi uyishaye esikhonkosini umfo kaMadlokovu kwathiwa asehlise umoya izolungiswa.
Ubuhlungu obuzwiwa yithina esilaphaya emazingeni aphansi esiphila nabo nsuku zonke ngokomsebenzi ababazi/ababuzwa. Bawuhlobo olwazi ukuthi thina ma-Afrika asazi lutho, yibona abaziyo nabahlakaniphile. Ngisho bengafika kamuva emsebenzini bezoqeqeshwa nguwe, uthi ungaqeda ukubafundisa umsebenzi bese befuna ukuba yizinduna bonke baphathe wena. Kambe kuyenzeka yini ukuthi uwedwa ube nezinduna ezine.Ngamafuphi Mhleli ngabe bona badalelwa ukuphatha hhayi ukuphathwa? Bheka-nje abakwaGupta uma sifunda amaphepha kuthiwa bafika kwelengabadi ngo-1993 okusho ukuthi baneminyaka ewu25 belapha kodwa bese kuyibona abese besitshela ukuthi kumele siqashe bani sixoshe bani.Ngabe kusamele sibathembe yini abaholi bethu? Ngibona kungayisenzo esihle Mhleli ukuthi sixolise kumfo kaMadlokovu ngokungamlaleli esixwayisa.
Ngiphinde ngibonge nakuAdvocate Thuli Madonsela ngokuthembeka kwakhe okungaka akwenzele izwe lonke ngokusivula amehlo sibe sithi siyabona singaboni. Besihleli singazi ukuthi asisaphethwe abengabadi sesiphethwe abokufika. Ngithi Mhleli naye uMadonsela ufanelwe wukubongwa ngokulwa nokungcola. Ukhombise ukulithanda izwe lakhe nabantu balo. Ngabe ngiyaphosisa yini uma ngithi ma-Afrika sinenkinga yomhobholo ngoba uma ubheka wonke amazwe ase-Afrika agcwele ubuphofu awathuthuki ngenxa yabaholi abazicabangela bona nemindeni yabo. Petrus “umzukulu kaGogo” Radebe EMADADENI