Silekeleleni safa yizinswelaboya kwaD eMlaza
MHLELI: Angibingelele ephepheni lakho engilikhonzile. Nginesikhalo lapha. Siyaphela siyafa wubugebengu obudla lubi kwaD eMlaza, uma nje usuka kweliShisayo uza ngomgwaqo uze uzodlula izihlahla ezisabekayo zasesikoleni Izwelesethembiso.
Okubuhlungu wukuthi lezi zingane ezibamba abantu inkunzi zincane. Okufike kube buhlungu kakhulu wukuthi akukho zinyathelo ezithathwayo ngalokhu kuhlukunyezwa kwethu. Zithatha amaselula ethu, opulasitiki esifake kubona ukudla.
Izingane nje ezifunda eMangosuthu University of Technology ziphucwa amaselula nezikhwama zezincwadi. Ama-passage nemigwaqo yakhona kugcwele abantu abaphila ngegazi labantu.
Iyacika le nto. Sesicela uNgqongqoshe wamaPhoyisa uMnuz Fikile Mbalula asisize ashanele kule ndawo. Singajabula uma singathola isiteshi samaphoyisa esingumahamba nendlwana endaweni esikhalisayo.