Ungena egiyeni elisha umkhankaso womdlavuza
amahora ayisishiyagalombili zonke izinsuku ukwelapha abantu abanesifo somdlavuza. Ukufika kwabo kusho ukuthi njalo ngenyanga sekuzohlengwa abantu abanomdlavuza abawu-150 abazobe bebonwa okokuqala nabawu-300 asebeke babonwa.
Labo ngoti kwezomdlavuza bazofaka omkhulu umfutho njengoba sinabane esibhedlela iGrey’s eMgungundlovu kanti futhi sinomshini owodwa osebenza kahle khona. Njalo ngenyanga eGrey’s kubonwa iziguli ezinomdlavuza ezintsha eziwu-140 bese ziba wu-500 ezisuke sezibuya.
Enyakatho nesifundazwe nakhona sibambisene nongoti bomdlavuza abazimele abasisiza kakhulu abasebenzela eNgwelezane naseLower Umfolozi Hospital. Lapha kusizwa iziguli eziqhamuka ezifundeni zaseKing Cetshwayo, Zululand naseMkhanyakude. Njengamanje ziwu-75 iziguli ezelashwa ngohlelo lweRadiation Therapy bese kuthi eziwu-40 zelashwe ngohlelo lweRadiotherapy. Phambilini zonke lezi ziguli zaziphoqeleka ukuthi zihambe ibanga elide ziya eNkosi Albert Luthuli Central Hospital kanti manje usizo seziluthola eduzane kakhulu nasemakhaya azo.
Esibhedlela i-Addington, zibalelwa ku-20 kuya ku-30 iziguli ezihlinzekwa ngosizo lokwelashwa (Chemotheraphy) zonke izinsuku nokwenziwa ngamaMedical Officers. Kunohlelo lokuthi kuyothi kungalunga imishini abeWits Health Consortium baphinde balethe odokotela abangongoti abalapha umdlavuza ababili bazosebenza e-Addington.
Kuzokhumbuleka ukuthi kuningi osekuke kwashiwo mayelana nezingqinamba ebezikhona njengoba uMnyango wezeMpilo ubulokhu ushiywa yilolu hlobo lodokotela. Konke lokhu kusho ukuthi abantu abanomdlavuza sebezolinda amasonto ayisithupha kuya kwayisishiyagalombili kuphela ngaphambi kokuthola usizo.
Umnyango ubambisene neNelson R Mandela School of Medicine umatasa nezinhlelo zokulungisa uhlelo lokuthi iNyuvesi yaKwaZulu-Natal ithole ilungelo lokuthi iqeqeshe odokotela futhi. Njengamanje umnyango uxhase uhlelo lokuqeqeshwa kodokotela abazoba wochwepheshe bomdlavuza, i-Oncology Registrar Training, kwezinye izifundazwe iWestern Cape naseFree State nokuzothi uma beqeda babuye bazolekelela lapha esifundazweni.
Isifo somdlavuza sehlukene futhi sibucayi. Kuya ngokuthi iyiphi ingxenye yomzimba ephethwe yiso nokuthi idinga ukwelashwa okungakanani. Siyafisa ukukugcizelela ukuthi kuzo zonke iziguli ezinomdlavuza wu-20% kuphela odinga udokotela ongungoti walesi sifo ngenxa yokujula komdlavuza wazo.
Ukhiye wokunqoba lesi sifo akusikho ukwelapha kodwa wukuhlolwa njalo ukuze uma sitholakala kumuntu abezempilo basheshe bangenelele.
Isifundazwe iKwaZuluNatal senza kahle kakhulu ngasohlangothini lokuhlolela umdlavuza kusetshenziswa imishini nasekwelapheni.
Zinhlanu izinhlobo zomdlavuza ezidlangile KwaZulu-Natal: Esokuqala isifo somdlavuza wesibeletho; isifo somdlavuza webele; kube umdlavuza wesifo samathumbu (Colorectal); umdlavuza oba phakathi komlomo namakhala obangelwa ukubhema nezilonda zomdlavuza eziba sekhanda nasemqaleni nomdlavuza oba semapayipini asesithweni sangasese somuntu wesilisa (Prostate cancer).
Sifisa ukuhlaba ikhwelo kwabesifazane nakubalingani babo ukuthi basilekelele ukulwa nomdlavuza webele. Ungakwenza kanjani lokhu? Kulula. Owesifazane kufanele ajwayele ukuzithinta amabele, abheke ukuthi akukho sigaxa yini esingajwayelekile. Uma lokhu kumhlula, angacela lowo ahlekisana naye ukuba amsize.
Njalo ekuseni angama phambi kwesibuko bese ephakamisa izingalo. Uma kukhona ibele elinyuka kakhulu kunelinye, lokho kungaba yinkomba yokuthi kukhona okungahambi kahle. Xhumana nomtholampilo oseduze uwubikele.
UDkt Sibongiseni Dhlomo unguNgqongqoshe wezeMpilo KwaZulu-Natal.