‘Unzima umsebenzi kangqongqoshe wezezimali’
IZAZI zomnotho zithi uNgqongqoshe wezeziMali, uMnuz Malusi Gigaba, kufanele eze namaqhinga amasha okungenisa uR50.8 billion oshoda esikhwameni sezwe nenye imali yokufeza izinhlelo zikahulumeni.
Kusasa, uGigaba uzokwethula umbiko wesabelozimali ePhalamende.
UMnuz David French, oyisazi somnotho esigxile kwezentela futhi ongumqondisi enkampanini ecwaninga amabhuku iMazars, uthe ungqongqoshe unomsebenzi onzima kulo nyaka wokuthi athole imali lapho engazi khona ukuze anciphise ukushoda kwemali esikhwameni sezwe, aphinde athole imali yemfundo yamahhala nokunye.
“Njengoba kuzoba nokhetho ungqongqoshe wezezimali uzothwala kanzima ngoba kufanele ajabulise abantu kodwa angenise nemali esikhwameni sezwe. Angimboni enyusa ngokudlulele intela ekhokhwa uma uthenga impahla iValue Added Tax (VAT). Ukunyuswa kwentela kuzofakela uhulumeni isigcwagcwa ngakho kumele kuziwe nezinye izindlela zokufaka imali ezweni,” kusho uFrench.
Uthe mhlawumbe ungqongqoshe uzonyusa intela yezinkampani neyezikhulu eziphezulu ngoba akafuni ukuziqhatha nabantu abasemazingeni aphansi.
UNkk Elna Moolman oyisazi somnotho eStandard Bank uthe abahola kakhulu bazoqhubeka nokukhokha intela enkulu.
Abaphuza utshwala, ababhemayo nabathanda iziphuzo ezinoshukela silindele bakhokhiswe intela enkulu ngoba uhulumeni usemkhankasweni wokuqinisekisa ukuthi abantu bayeka imikhuba emibi nokungenisa imali esikhwameni sezwe. Uthe izindaba ezinhle wukuthi izwe ngeke lehliswe kwezomnotho ngoba kunozinzo kwezepolitiki. “Unzima umsebenzi kangqongqoshe wezezimali ngoba besithi uzonyusa iVAT kodwa lokhu kuzomdalela amazinyo abushelelezi njengoba kuyiwa okhethweni luka2019. Ngibona kuzonyuswa intela yabahola kakhulu. Kuzoba nentela eziphuzweni ezihlohlozayo nezinoshukela. Kufanele kungene intela kaR1.5 billion ngeziphuzo ezinoshukela nekaR2.5 billion ngogwayi notshwala,” kusho uNkk Moolman.
Uveze ukuthi mhlawumbe uGigaba uzodayisa impahla kahulumeni ukuze angenise u-R30 billion esikhwameni sezwe kodwa-ke konke kuzocaca kusasa.
UMnuz Johann Els oyiNhloko yezokucwaninga ngomnotho kwa-Old Mutual Investment Group, uthe isabelozimali salo nyaka sizoba nzima ngoba ziningi izinhlelo okunqunywe ngazo kube kungaziwa ukuthi imali izophumaphi.
“Silindele ukuthi umnotho ube ngcono kulo nyaka kodwa uhulumeni udinga ukungenisa uR30 billion ngokuqoqa intela. Sizobona uhulumeni enyusa intela kaphethroli kanjalo abantu silindele ukuthi bangabe besakhokhelwa imali ngokusebenzisa ama-medical aid lokhu kungangenisa uR18 billion esikhwameni sezwe,” kusho u-Els.
Uthe uma kuqhubeka kuba nozinzo kwipolitiki balindele ukuthi izwe likleliswe endaweni ekahle yizinhlangano ezicwaninga ngomnotho futhi neRandi balibona liqhubeka nokusimama.
UMnuz Nico Kruger weSouth African Institute of Chartered Accountants (SAICA), uthe osomabhizinisi abafihla inzuzo abayenze eNingizimu Afrika kuma-akhawunti akwamanye amazwe bazohlawuliswa intela enkulu ukuze kungeniswe imali esikhwameni sezwe.