Akafuni banethezeke abePirates
ULWELA ukuqeda ukunethezeka kubadlali be-Orlando Pirates umqeqeshi, uMilutin “Micho” Sredojevic, ozibekele umgomo wokubuyisela leli qembu emiqhudelwaneni yeCAF.
USredojevic ufike kwiPirates ekuqaleni kwesizini ka-2017/2018 kubhekwe lukhulu kuyena. Usephendule iPirates elinye lamaqembu asembangweni wesicoco se-Absa Premiership.
Umenyezelwe njengomqeqeshi ovelele kaJanuwari esithangamini nabezindaba ebesikade sisemahhovisi ePremier Soccer League (PSL), eGoli, izolo. Umdlali ovelele kaJanuwari nguSiphesihle “Mbesuma” Ndlovu weMaritzburg United kwathi igoli elivelele kwaba ngelikaTiyani Mabunda weMamelodi Sundowns alishaye behlula iBloemfontein Celtic ngo 4-1 eLoftus Verfeld.
Ngaphansi kukaMicho, iPirates iwine imidlalo emithathu kwemine, yashaya amagoli ayisishiyagalolunye. Kubalwa nomdlalo exebule kuwona iMamelodi Sundowns ngo 3-1 eLoftus.
USredojevic uthe lokhu kungenxa yomsebenzi onzima abawenzayo kweZimnyama.
“Lo mklomelo uzosifaka umdlandla ikakhulukazi kule midlalo esibhekene nayo njengoba umbango uya ngokushuba futhi udinga ukuthi wenze okungaphezulu. Nokho awusenzi ukuthi sijabule size sikhohlwe okubalulekile. Uyizithelo zokungalali ebusuku. Sibheke lezi zinyanga ezintathu ezisele ngaphambi kokuphela kwesizini. Umklomelo ungowawo wonke umuntu okwiPirates, abadlali, ithimba labaqeqeshi abaphathi nabalandeli. Mina ngizokwemukela nje,” kusho uSredojevic.
Nakuba iPirates ibukeka izoshisisa umbango wesicoco seligi kuze kube sekugcineni kodwa uSredojevic ugxekwa ngokushintsha isikimu sonke isikhathi. Emdlalweni wakamuva ne-Ajax Cape Town ufake uBernard Morrison obelizwa ngendaba ijezi. Lo mgadli ushaye amagoli amabili kulo mdlalo.
Kubadlali abalizwa ngendaba ijezi kwiPirates kukhona uThamsanqa Sangweni obeyibamba kwiChippa United noJustice Chabalala odlala emuva.
“Bangabadlali ababalulekile eqenjini lethu. Uma sebekulungele ukudlala ngokomoya, okomzimba nangazo zonke izindlela bazolithola ithuba. Bobabili bayakulwela ukungena eqenjini. Bonke abadlali basembangweni,” kusho uSredojevic.
“Abadlali banemizwa futhi babhekana nezingqinamba okungaba wukulimala noma amakhadi. Ngifuna ukwakha uhlelo lokuthi okungenani abadlali abathathu babange indawo eyodwa eqenjini. Ngifuna ukuqeda ukunethezeka kubadlali. Angifuni kube khona ozokwazi ukuthi unendawo yakhe.”
Ngaphambi kokufika kukaMicho abadlali bePirates, eqede isizini edlule ngaphandle kwe-Top 8, kade begxekwa ngokuthatha izinto kancane ngoba bazi ukuthi bazosithola isikimu. Kulaba badlali bekubalwa ukaputeni u-Oupa Manyisa ofudukele kwiSundowns, Mpho Makola noThabo Matlaba.