Oqashwe wuKhozi FM akalona ivukana
NGESIKHATHI kuvela izindaba zokuthi uKhozi FM luqashe nomsakazi omusha ozokwenza uhlelo lomculo we-hip hop ngoLwesihlanu phakathi kuka-11 ebusuku no-2 ekuseni, baningi abazibuze ukuthi ngubani lo Lindani ‘Leeh’ Hlophe. Isolezwe lithe alikuthathe likubeke ngomlando kaLeeh. ULeeh yinsizwa ezalelwe KwaNzimakwe ePort Shepstone eminyakeni ewu27 eyedlule.
ULeeh uyinkosana kubo, uqale ukufunda eXhonywa Primary kodwa waphothula uGrade 12 eBheki Secondary ngo-2009 ngaphambi kokufundela ukusakaza eCreative Arts College, eThekwini ngo-2012.
“Yize ngafunda unyaka owodwa kodwa yilapho engafunda konke ngezokusakaza,” kusho uLeeh.
Uqale ukusakaza kwiNanda 88.4 FM ngo-2013, enza uhlelo lwangezintathakusa ngo-12 kuya ku-3 ekuseni oluthi Kasi Flavour.
“Ngabuye ngenza olwantambama kuwona lo msakazo phakathi kuka-3 no-6 oluthi Loxion Drive. Ngadlulela kwelasekuseni ngezimpelasonto phakathi kuka-6 no-9 oluthi Morning Shake Up,” kuchaza uLeeh.
ULeeh uthe uKhozi lumthathe esenza uhlelo lwe-hip hop, iHood Up, okuwuhlelo abeselwenze unyaka owodwa.
Ebuzwa ukuthi uzizwe kanjani esethola izindaba ezimnandi zokuqashwa wuKhozi FM, uthe kufezeke amaphupho akhe eminyaka.
“Ngijabule kakhulu ngokuthola ithuba emsakazweni ohamba phambili eNingizimu Afrika noyintandokazi, UKhozi FM. Abalaleli boKhozi FM nabeNamba Namba bangalindela ukuzwa uhlelo oluseqophelweni oluphezulu lwe-hip hop, ubumnandi bohlelo nenjabulo abazoyithola ohlelweni. Noma kuthiwa awuyithandi i-hip hop, mina ngizokwenza uyithande futhi uyijabulele ngoba umsebenzi wami ngiyawuhlonipha futhi ngiwenza ngothando nangokuzinikela. Ukusakaza kuKhozi FM bekuyiphupho lami, ngakho lokhu osokwenzeka ukufezeka kwephupho lami ukuba soKhozini FM,” kusho uLeeh.
Ngaphandle kokusakaza uLeeh ubuye asebenze emini njengomdayisi esitolo sezingubo zokugqoka iXS Denim eThekwini futhi unencwadi ekhuthazayo azoyikhipha kulo nyaka esihloko sithi I Own My Dream.
“Le ncwadi ngiqale ukuyibhala ngo-2017 futhi ikhuluma ngokukholelwa ephusheni lakho,” kuphetha uLeeh ozoqala ukuzwakala kulo msakazo ngalolu Lwesihlanu ngo-11 kuya ku-2 ekuseni ngoMgqibelo.