Uvule izandla ngolwabakwaGrade R
UNGQONGQOSHE wezeMfundo KwaZulu-Natal, uMnuz Mthandeni Dlungwane uthi iminyango yakhe ivuliwe ukuze kuxoxwe ngezinto ezithinta ezemfundo okubalwa nemihlomulo yothisha bakwaGrade R.
Lokhu kulandela umbhikisho weSadtu izolo ngaphandle kwamahhovisi alo mnyango eMgungundlovu ngodaba lokunyuselwa kwalabo thisha amaholo.
Umnyango wathembisa ukunyusela labo thisha amaholo ngoDisemba nyakenye kodwa kwangenzeka.
UDlungwane uthe: “Sifuna ukuqinisekisa othisha bakwaGrade R kanjalo nomphakathi ukuthi siyayibheka indaba yabo. Sizimisele ukuthi kunyuswe umholo wabo ngoba mkhulu umsebenzi abawenzayo.” Uthe bahlale bebhunga nezinhlaka ezehlukene ngodaba lwakwaGrade R. Uthe bonke abafisa ukuxoxa naye ngalolu daba, izandla zakhe zivuliwe.
Esithangamini nabezindaba ngeledlule eThekwini, uNobhala weSadtu uNksz Nomarashiya Caluza, uthe umnyango uyaqhubeka nokwenza izethembiso ongazigcini. UMnuz Allen Thompson, iPhini likaMengameli weNatu, uthe njengoba kuqale unyaka omusha wezimali ngo-Ephreli, azikho izimpawu zokuthi izinkontileka zabo zizovuselelwa. “Maningi amathuba okuthi kungavulwa nokuvulwa uma kungukuthi umnyango awubakhokheli. Sicele uNgqongqoshe kazwelonke uNkk Angie Motshekga ukuthi eze kulesi sifundazwe angenelele.” Izinyunyana zifuna labo thisha bakhokhelwe uR10 000 ngenyanga njengoba kwezinye izifundazwe behola le mali.
Okwamanje bahola uR6 500 ngenyanga kanti sekuneminyaka imali yagcina ukunyuswa.
Khonamanjalo selifikile ithimba elijutshwe nguNkk Motshekga ukuzophenya ngezinkinga ezibhekene nomnyango wezemfundo esifundazweni.
Kuleli thimba kukhona abazophenya izinto ezithinta ukuqasha emnyangweni nokwenzekayo kulo mnyango kulandela umhlangano phakathi kukaNkk Motshekga neNatu.
Okhulumela umnyango kazwelonke, uMnuz Elijah Mhlanga, uthe emhlanganweni weNatu noNkk Motshekga ngeledlule, kuvunyelwene ngokuthi kumele kuphenywe okwenzeka kulo mnyango wesifundazwe.
Le nyunyana ifuna umnyango wesifundazwe ufakwe ngaphansi kokulawulwa ngumnyango kazwelonke ngoba ithi izikhulu zesifundazwe sezihlulekile ukuphatha ngendlela umnyango. “UNgqongqoshe kazwelonke uzohlangana ngokushesha noNgqongqoshe wesifundazwe ukuze amtshele ngezikhalazo ezimthinta ngqo. Kuvunyelwene futhi ngokuthi uNkk Motshekga ajube ithimba elizohlanganisa nomnyango kamgcinimafa, elomnyango wezisebenzi zikahulumeni nokuphatha kanjalo nezinye izikhulu ezizozinza kulesi sifundazwe ukuze ziphenye,” kusho uMhlanga.
UMhlanga uthe bazoyibheka nendaba ethinta abafundi abangenazo izitifiketi zokuzalwa.
“UNgqongqoshe uyakugcizelela eyokuthi awukho umyalelo wokuthi bangaxhaswa abafundi abangenazo izitifiketi zokuzalwa. UNgqongqoshe uzohlangana nozakwabo emnyangweni wezasekhaya ukuze kubhekwane nendaba yabafundi abangenazo izitifiketi,” kusho uMhlanga.
Uthe nendaba yokusatshalaliswa kwamaqakelo kubafundi ngenye yezinto ebhungwe kulo mhlangano neNatu.
Umnyango wesifundazwe uchithe uR109 million ukusabalalisa amaqakelo ezikoleni zesifundazwe.
UDlungwane ujube uphenyo ngendaba yamaqakelo kanjalo nezinsolo zokuthi agcwele avale indawo ezikoleni.