Bakhathele wukulinda umnyama ongenafu ababengamasosha
BAGASELE eCity Hall eThekwini izolo ekuseni omakadebona be-ANC ababengamasosha e-MKMVA esifundeni iTheku befuna ukubonana neMeya yeTheku uNkk Zandile Gumede bekhala ngokungasebenzi.
Omakadebona bagasele kule ndawo ngabo-6 ekuseni kwaze kwaba yintambama bethi abayi ndawo balinde iMeya ngoba bafuna ukubhekeleleka.
Bebecula izingoma zomzabalazo amaphoyisa enkanise yonke indawo eqaphe isimo. Amanye amalungu ale nhlangano acele ukungavezwa, athe asekhathele ukulinda umnyama ongenafu ngoba alambile. Athe athenjiswa ukuthi azofakwa emikhakheni ethile emkhandlwini ukuze asebenze.
“Silambile, indlala ikwenza wenze noma yini. Sikhathele ukulinda into engekho emkhandlwini,” kusho elinye ilungu le-MKMVA.
Elinye ilungu lithe baneziqu kodwa abasebenzi ekubeni balwela inkululeko.
“Asifuni ukukhangezwa sifuna ukunikwa umsebenzi sisebenze. Imeya yasithembisa ukuthi izozama kodwa kuze kube yimanje akwenzeki lutho. Uphiko lwentsha lufuna kube yintsha engu-40% ezofakwa ezikhundleni, abesifazane be-ANC bafuna u-50% thina sifuna u-10% kuphela hhayi into eningi,” kusho elinye ilungu.
Athe awafuni ukusebenzisa izinto azifunda ehlathini ukuze aziphilise.
“Siziphethe kahle noma silambile. Ukuhamba kancane kwezinto kwenza abanye baphelelwa yisineke bangena ngodli ezindlini zomxhaso ezindaweni ezehlukene. Asifuni ukuthi sifane nezinye izinhlangano ezisebenzisa udlame ukuze zithole ezikufunayo.”
Okhulumela iMeya, uMnuz Mthunzi Gumede, uthe bayaqhubeka nokuxoxisana neMKMVA.
Uthe akekho obikile ukuthi usatshisiwe noma ukuphazamiseka kokusebenza kweCity Hall (okunamahhovisi omkhandlu neleMeya).
“Sizoqhubeka sixoxe size sifinyelele esivumelwaneni.”