Imali ezogibelisa abaya kwelikaZuma
IZINHLANGANO zosomabhizinisi abeseka obengumengameli uMnuz Jacob Zuma zinxusa abantu ukuba baqoqe imali ezosiza ukuthutha abalandeli bakhe abazomeseka uma eseya enkantolo ngoLwesihlanu.
UZuma kulindeleke ukuthi avele eNkantolo eNkulu yaseThekwini ngoLwesihlanu mayelana namacala angu-16 enkohlakalo okubalwa nokushushumbisa imali. Amacala ahlobene nethenda yokuthengwa kwezikhali.
UZuma uzovela enkantolo nezikhulu zeThint okuyinkampani yaseFrance edayisa izikhali.
Izinhlangano zosomabhizinisi okubalwa kuzo iNational Funeral Practitioners Association of South Africa (NafupaSA), Delangokubona, Asidle Sonke Business Forum, National Unemployed People’s Trust nenhlangano yezepolitiki iBLF zinxusa abantu ukuba bafake isandla esikhwameni iJacob Zuma Trust. Lesi sikhwama besivele sikhona sisiza iztshudeni ngemali yokufunda emanyuvesi.
IPhini likamengameli weDelangokubona, uNksz Ntsiki Ncayiyana, lithe imali izofakwa kwiakhawunti yeZuma Trust.
Uthe imali ezoqoqwa izosiza ukugibelisa abalandeli bakaZuma uma sebeya ecaleni.
Uthe okwamanje ayikho imali esangenile kusukela behlabe ikhwelo lokuthi mayifakwe imali.
Umengameli weNafupaSA, uMnuz Muzi Hlengwa, uthe amalungu ezinhlangano zabo yiwona azokhokhela izinto zokuhamba ezizothutha abalandeli abaya enkantolo.
INhloko yoPhiko lwezokuShushisa, u-Advocate Shaun Abrahams, isanda kuwavusa kabusha amacala kaZuma ngemuva kokuhoxiswa kwawo owayephethe lolu phiko phambilini.
UHlengwa uthe bazophinde babe nomlindelo ngaphandle kwenkantolo ngaphambi kokuthi uZuma avele khona. Uthe abefundisi bamabandla ehlukene bazomkhulekela uZuma kulesi sikhathi esinzima abhekene naso.
“UMkhandlu weTheku usinike nemvume yokuthi simashe sisuka kuBotha siye enkantolo ngoLwesihlanu,” kusho uHlengwa.
Umholi weBLF, uMnuz Andile Mngxitama, unxuse wonke amalungu omphakathi noma ngabe kuthiwa aseka maphi amaqembu ezepolitiki ukuba nawo abambe iqhaza ekwesekeni uZuma.
Khonamanjalo, indodana kaZuma, uMnuz Edward Zuma izolo ikhiphe isitatimende igxeka uNgqongqoshe wamaPhoyisa uMnuz Bheki Cele ngokunxusa abantu ukuba bangalinge baseke uZuma egameni le-ANC.
“Akusiyo into enhle ukuthi kunqatshelwe abantu ukuba baseke baphinde bazwakalise ilaka labo mayelana namacala ahlekisayo abekwe ubaba,” kusho u-Edward.
Uthe bewumndeni ngeke baze balisebenzise igama le-ANC kodwa wathi uzoya enkantolo njengelungu lale nhlangano. NoMngxitama ugxeke uCele ngokusabisa abalandeli bakaZuma.