Lubhekwe ngabomvu ukhetho lwaseJozini
OLWAMANQAMU namhlanje okhethweni lokuchiyibela olubhekwe ngabomvu oluzoba seJozini ngemuva kokushona kwekhansela le-ANC, uMnuz Njabulo Dlamini, elagwazwa ngesikhathi lizikhiphile nomndeni walo ebhishi laseRichards Bay ngoDisemba nyakenye.
Umbango omkhulu uphakathi kwe-ANC ne-IFP.
I-ANC ifuna ukuvikela isihlalo sayo, i-IFP ifuna ukusihlwithwa.
Intshisekelo ye-IFP yokunqoba ukhetho ibonakele ngeSonto ngesikhathi igadla ngomholi wayo inkosi Mangosuthu Buthelezi ofike kule ndawo ezokhankasa.
UButhelezi ufike kule ndawo ezonxusa amavoti waphinde wavula nomuzi owakhiwe wuMkhandlu waseJozini onikelelwe umndeni wakwaDlamini.
Umndeni ubuhlala endlini yodaka ongekho esimeni sokuhlala abantu. Umuzi omusha uvulwe ngokusemthethweni uButhelezi neMeya yaseJozini, uMnuz Delani Mabika.
Ngemuva kokuvula umuzi uButhelezi ube eseyothula inkulumo yakhe embuthanweni weqembu.
UNobhala we-ANC eFar North, uMnuz Nkosingiphile Mlambo, uthe banethemba lokuthi bazosibuyisa isihlalo sabo ngemuva kokhankasa kanzima.
“Singene umuzi nomuzi sikhankasa abantu abaningi bathembisile ukuthi bazosiboleka ivoti labo ngoba bafuna kuqhubeke thina nokuphatha i-ward,” kusho uMlambo.
Uthe bafuna ukulinqoba noma yikanjani ukhetho ukuhlonipha uDlamini obesebenza ngokukhulu ukuzikhandla.
UMnuz Thabani Ngwira we-IEC KwaZulu-Natal ukuqinisekisile ukuthi lukhona ukhetho lokuchibiyela oluzoba ku-ward 2, eJozini ngemuva kokushona kwekhansela le-ANC, uNjabulo Dlamini, nyakenye.
UNgwira uthe konke sekumi ngomumo mayelana namalungiselelo okusingatha ukhetho.
Unxuse ukuthi kube nokubekezelelani emaqenjini ezepolitiki ukuze ukhetho luhambe kahle.