Utholwe eduze kwekhaya ebulewe
USADIDEKILE umndeni wowesifazane (49) waseZwelibomvu otholakale ebulewe esikhotheni esiseduze kwakubo emuva kokunyamalala ngePhasika, eya ethaveni yakubo.
Kuthiwa uNksz Sibongile Mkhize utholakale esikhotheni esingekude nalapho abehlala khona, ngeSonto ekuseni emuva kokunyamalala ngoLwesihlanu lwePhasika ntambama ephuma esontweni.
Umfowabo omncane, uMnuz Msizi Mkhize uthe bashaqekile bethola umyalezo othi udadewabo utholakale esikhotheni esiseduze nasekhaya elimele, exebuke nobuso.
Uthe udadewabo bamgcine eya ethaveni yakubo lapho abebevame ukuthi bahlale khona noma basize ngokusebenza khona.
“Ubekade ebuye esontweni wapheka, wase eba ngumuntu oya ethaveni. Angazi noma ubeya ngoba eyosiza noma ubeyozihlalela khona ngoba ubeke azihlalele khona. Ngesikhathi engabuyi asizitshelanga ukuthi kukhona okwenzekile kuyena ngoba ubengumtu osekhulile.
Besizitshela ukuthi kukhona la eye khona, usazobuya. Sithukile uma esetholakala eshonile,” kusho uMkhize.
Ubabaze isihluku abulawe ngaso udadewabo, wathi senza kube nzima kubona bengumndeni ukwamukela ukushona kwakhe.
“Kubonakala sengathi uqale wadlwengulwa kodwa asazi noma yibona yini laba bantu abambulele abamlimaze ngale ndlela ebusweni,” kusho uMkhize.
Kwenzeka lesi sigameko nje kule ndawo kusanda kubulawa uNkk Hlakaniphile Ngcongo obengumthandazi, obulawe ngumlisa ongaziwa owafika kwakhe ethi uzohlola.
Okhulumela amaphoyisa KwaZulu-Natal, uColonel Thembeka Mbele ukuqinisekisile ukuthi amaphoyisa avule icala lokubulala emuva kokuthi kutholakale isidumbu sowesifazane simabokoboko umzimba wonke.
Uthe asikaziwa isizathu sokuhlaselwa kwakhe.