Udilikajele kumlisa owabulala ehostela iGlebe
UGWETSHWE udilikajele umlisa wasehostela laseMlaza, iGlebelands owabulala owesifazane (52) owayenesitolo owabulawa abalisa ababezenza amakhasimende
Izolo, inkantolo yesifunda eThekwini igwebe uKhayelihle Mroza Mbuthuma (28) udilikajele ngecala lokubulawa kukaNkk Sibongile Mtshali okuthiwa wahlaselwa abalisa ababezenza amakhasimende ngoJulayi nyakenye.
UMbuthuma utholwe yinkantolo enecala ngoLwesine oludlule kodwa wagwetshwa izolo.
Obambe kwesokuba nguKhomishana wamaPhoyisa KwaZuluNatal, uMajor General Bheki Langa, usishayele ihlombe isinqumo senkantolo ngokugweba uMbuthuma udilikajele.
Ubonge ithimba ebeliphenya nalabo abebesebenza kuleli cala ngomsebenzi wabo oholele ekutheni agcine ejezile lo mlisa.
“Besisolwa futhi singanikwa isikhathi esenele sokuphenya amacala ngokufanele. Manje ukusebenza kwethu kanzima sekulethe imiphumela emihle kanti futhi lesi sigwebo sizothumela nomyalezo oshubile kwezinye izigebengu ezihlukumeza umphakthi wasehostela,” kusho uLanga.
Ngonyaka odlule Isolezwe labika ngokubulawa kukaNkk Mtshali okuthiwa wayesendlini yakhe ayephinde ayisebenzise njengesitolo ngoJulayi 26 nyakenye, emuva kwehora lesishiyagalombili ebusuku ngesikhathi engenelwa abalisa ababili ababezenza amakhasimende.
Laba balisa bafika bavulela ngenhlamvu, bambulala uNkk Mtshali base bebaleka.
Bamdubula ekhanda nasesifubeni washonela khona lapho. UMbuthuma uboshwe ngo-Agasti nyakenye.