AbaThembu bafisa uWinnie afihlwe eQunu
ISILO sabaThembu, u-Azenathi Dalindyebo, sizohamba nethimba laso siyobona umndeni kaNkk Winnie Madikizela-Mandela eGoli ukuyowazisa ngesifiso sabo sokuthi afihlwe eQunu, e-Eastern Cape. Umkhulumeli weSilo, inkosi Zwelenqaba Mgudlwa, uthe kuyisifiso sabaThembu ukuthi uNkk Madikizela-Mandela afihlwe eQunu kodwa-ke iSilo ngeke siphoqe umndeni ukuthi wenzeni.
UMadikizela-Mandela ushone ngoMsombuluko esibhedlela iMilpark ngemuva kokugula.
UMgudlwa uthe bamhlonipha kakhulu uMadikizela-Mandela ngoba uganele esizweni sabo yize ahlukanisa nowayengumengameli wokuqala wentando yabantu, uMnuz Nelson Mandela, ngo-1996. “Ubeyinkosikazi kaMandela, isiko lethu lithi uhlala eyinkosikazi yesizwe aze ashone. Akukho ukuhlukanisa osikweni lwethu. Uma ushadile walotsholwa uhlala ungumakoti,” kusho uMgudlwa. Uthe abakwaMadikizela bazohlangana neSilo uDalindyebo ngoLwesine. “Ngesikhathi ngikhuluma nomfowabo, uMntwana uMadikizela, ubengazi ukuthi umngcwabo uzoba kuphi. Bazoza esigodlweni iBumbane Great Place ngoLwesine ukuze baxoxe neSilo,” kusho uMgudlwa.
UDkt Nokuzola Mndende wesikhungo Icamagu uthe labo abafuna uNkk Madikizela-Mandela afihlwe eQunu abaphambani nomthetho ngoba vele useyinkosikazi kaMandela ngokwesiko. “UNkk Madikizela-Mandela wasikelwa indawo nguMandela esejele. Walandela umthetho njengenkosikazi. Ubeyinkosikazi ngisho sebehlukanisile. Ngokwesintu asikho isihlukaniso kuba ngumyeni ohambayo emzini wakhe uma esethatha inkosikazi yesibili.”
NgoJanuwari inkantolo yachitha isicelo sikaNkk Madikizela-Mandela sokuthi athole umuzi oseQunu uMandela awushiyela umndeni wakhe.
Udaba lubange ingxabano phakathi kukaNkk MadikizelaMandela nomzukulu kaMandela, inkosi Mandla Mandela. Izolo inkosi Mandla Mandela ithumele isitatimende sokuzwelana nomndeni kaNkk MadikizelaMandela yabhala ukuthi: “Sithi dudu emndenini kaMam ‘Winnie Winifred Nomzamo Madikizela. INingizimu Afrika ilahlekelwe yisishoshovu somzabalazo. Sithi dudu ezinganeni zakhe, abazukulu nomndeni wonkana, umoya wakhe uphumule ngokuthula,”
Abantu bayiphoxile inkosi Mandela kwiTwitter bebuza ukuthi kungani iqhelise umndeni wakwaMandela noNkk Winnie Madikizela-Mandela.
UMnuz Themba Matanzima, okhulumela umndeni kaNkk Madikizela-Mandela, izolo uthe uzofihlwa ngoMgqibelo, Ephreli 14, emathuneni aseFourways, eGoli.
Uthe ngeke akwazi ukuphendula ukuthi kungani uNkk Madikizela-Mandela ezofihlwa eFourways ngoba ngumndeni osunqume lokho futhi abantu kufanele bakuhloniphe.
Esitatimendeni uMengameli Cyril Ramaphosa uthe wonke amafulegi azondizela phansi ukuhlonishwa uNkk MadikizelaMandela. Uzolilelwa kusukela izolo Ephreli 3 kuze kube ngu-Ephreli 14 usuku azongcwatshwa ngalo.
Inkonzo yesikhumbuzo izoba sesontweni lamaRoma eliseSoweto, iRegina Mundi ngo-Ephreli 11. Inkonzo yomgcwabo izoba se-Orlando Stadium, eSoweto, ngo-Ephreli 14.