Bawufuna ezikoleni umlando weqhawe
I-SOUTH African Communist Party (SACP) ithi kufanele kufundwe ngomlando wesishoshovu somzabalazo esingumama wesizwe, uNkk Winnie Madikizela-Mandela. UMnuz Alex Mashilo okhulumela iSACP kuzwelonke uthe bawuqala phansi umkhankaso wabo wokuthi kufundwe ngamaqhawe omzabalazo aseNingizimu Afrika ezikoleni zakuleli. “Silahlekelwa ngamaqhawe omzabalazo minyaka yonke. Kufanele izingane zethu zifunde ngawo zingalokhu zifunda ngomlando wakwamanye amazwe,” kusho uMashilo.
Uthe kubalulekile ukuthi kuqoshwe umlando womzabalazo ukuze wonke umuntu azi ngezinkinga ezazibhekene nawo ngesikhathi sobandlululo.
“Ayikho imizamo eyenziwayo ukufundisa intsha ngomzabalazo. Kufanele kubhalwe izincwadi umlando womzabalazo ufundiswe ezikoleni,” kusho uMashilo.
Uthe intsha kufanele ibone ukuthi umzabalazo wawunzima ukuze ikwazi ukulwa nenkohlakalo nokucwasa.
Ngo-2014 inyunyana iSouth African Democratic Teatchers Union (Sadtu) yathi kufanele kufundwe ngomzabalazo ezikoleni ukuze abantu bazowazi kahle umlando wezwe.
IPhini likaNobhala Jikelele weSadtu, uMnuz Nkosana Dolopi lithe intsha kufanele iqonde umlando wezwe kahle ukuze yakhe ikusasa eliqhakazile. Uthe eCuba kufundwa ngomlando wakhona, yingakho abantu bakhona belithanda izwe labo futhi besebenza ngokuzikhandla ukulithuthukisa. Uthe umlando ofundwa ezikoleni ugxile kakhulu kokwakwenzeka e-Europe esikhundleni sokufundisa ngamaqhawe asekhaya.
“Sifuna umlando ocacile ngomengameli wokuqala wentando yabantu uMnuz Nelson Mandela, ukuze izingane zazi ukuthi wayeyilungu le-ANC, wakhulela kuyona,” kusho uDolopi. UMnuz Allen Thompson oyiPhini likaMengameli weNational Teatchers Union uthe bayakweseka okushiwo yiSACP ngoba umlando wezwe ubalulekile.
“Uhulumeni kufanele anikeze osolwazi bomlando, ikakhulukazi owaseNingizimu Afrika ukuze bawubhale kahle. Abantu bazi ngakho konke okwakwenzeka ezweni. Umlando wethu kufanele uhlanganise okwakudala ukuze sibumbane siyizwe,” kusho uThompson.