Sizomvikela njengoba eseshonile - Juju
UMHOLI we-EFF uMnuz Julius Malema uthe iNingizimu Afrika ayisoze iphinde ifane njengoba singasekho isishoshovu somzabalazo ebesingumama wesizwe, uNkk Winnie MadikizelaMandela.
UMalema obevakashele umndeni kaNkk MadikizelaMandela emzini wawo okuMaseli Street, eSoweto, uthe ubengumama wawo wonke umuntu ngakho i-ANC akufanele imenze owayo yodwa. “Sahluleka wukumvikela umama uWinnie, kwakufanele kube wuyena umengameli wezwe kodwa wayalelwa ukuthi angalungeneli ukhetho lwesikhundla sephini likamengameli we-ANC engqungqutheleni eyayiseMafikeng. Ukube walungenela ngabe uZuma (Jacob) akazange abe ngumengameli. Sizomvikela umama njengoba eseshonile ngeke sivume ukuthi abantu akade bengamfuni benze sengathi bebemthanda,” kusho uMalema.
Uthe uNkk MadikizelaMandela uzabalazele bonke abantu baseNingizimu Afrika ngisho nabamzondayo.
“Umama (Nkk MadikizelaMandela) usizabalazele sonke, ubesithanda sonke ngisho nalabo akade bengamfuni. Ngiyababona nje lapha sekuyibona abakhuluma kakhulu bezenza sengathi bebemthanda. Sizobacela ukuthi bahambe futhi uma beqhubeka nokuzenzisa sizobadalula emphakathini,” kusho uMalema ongazange athande ukuphendula imibuzo yezintatheli izolo.
UNkk Madikizela-Mandela ushone ngoMsombuluko eneminyaka engu-81, esibhedlela iNetcare Milpark esiseGauteng.
Abaholi bebelokhu bengenile emzini kaNkk MadikizelaMandela oseSoweto izolo kanti uNgqongqoshe wezobuCiko namaSiko, uMnuz Nathi Mthethwa uthe akekho omunye umholi oyofana noNkk MadikizelaMandela ngokuthanda isizwe, nokulwela amalungelo aso.
UMengameli Cyril Ramaphosa uthe uNkk Madikizela-Mandela ubengumama othanda ubunye ehlanganisa wonke amalungu e-ANC nabantu baseNingizimu Afrika bonkana.
“Ubengumuntu othanda ubumbano futhi eneqiniso. Ubesihlanganisa singabaholi, asiluleke asikhuze uma kukhona lapho singenzi kahle khona. Sizomhlonipha ngomngcwabo wesizwe onikezwa amagugu ethu,” kusho uRamaphosa.
UNgqongqoshe wezokuXhumana uNkk Nomvula Mokonyane uthe bebenobudlelwano bukamama nendodakazi benoNkk MadikizelaMandela futhi ubexoxa naye ngayo yonke into.