Kushoda R7 billion emxhakeni wakwaSars obekumele uqoqwe

I-SOUTH African Revenue Service (Sars) iqoqe uR1. 216 trillion okusho ukuthi ishode ngoR7 billion imali akade kufanele iyiqoqe.

Ngokusho kukaNgqongqoshe wezeziMali, uMnuz Nhlanhla Nene, iSars ibizimisele ngokuqoqa uR1. 217 trillion. Uthe iSars ibuyisele kubantu uR234.3 billion.

Intela ekhokhwa ngabantu ifake uR462.5 billion (38%) wemali eqoqwe yiSars, kwathi iValue Added Tax (Vat) yangenisa uR297.8 billion (24.5%) emalini eqoqiwe.

Intela yamabhizinisi ingenisa uR220.2 billion (18.1%) emalini eqoqwe yiSars bese kuthi intela yempahla engena ezweni nephumayo yangenisa uR49.4 billion (4.1%).

UNene udonse ngendlebe abantu ukuthi bakhokhe intela ngoba u-90% wesabelomali sezwe bawuthatha enteleni.

Isikhulu sakwaSars esibambile, uMnuz Mark Kingon sitshele abezindaba ukuthi abantu bayawulandela umthetho wokukhokhwa kwentela yingakho iSars ikwaze ukuqoqa imali engaka.

Uthe abantu abazizele bona ukuzosho ukuthi balondoloza imali kwamanye amazwe, bangenise intela kaR2.9 billion.

Uveze ukuthi bangu-2 024 abantu ababefake izicelo zokuxolelwa ngokungasho ukuthi balondoloza imali kwamanye amazwe, bakwazi ukuqoqa intela yaba ngu-827 kulabo abatshala imali yabo kwamanye amazwe.

Osomabhizinisi bakuleli abadumile bangenisa uR8 billion wentela.

UKingon ukhale ngosomabhizinisi abangayiqoqi intela yezimpahla iVAT kanjalo neyePay as you Earn (PAYE).

Ubonge abasebenzi abangu-13 500 bakwaSARS athe bayibambe ishisa yize le nhlangano ibiyehlelwa yisithunzi.

Ucele abantu ukuthi bangayibalekeli intela ngoba ibalulekile ukuze kuthuthukiswe izwe.