Imibono yabahlaziyi kolwesikaMaimane
ANGASE asibange nomunye umholi isikhundla sokuhola iDA uMnuz Mmusi Maimane.
Abahlaziyi bepolitiki bakusho lokhu emuva kokuthi uSotswebhu weDA, uMnuz John Steenhuisen, ebhale incwadi egxeka ukuphakanyiswa kokuthi uMaimane anikwe ihlandla lesibili lokuhola leli qembu.
Uthe uMaimane akufanele anikezwe ihlandla lesibili ngoba uzomosha iqembu njengoba kwenze obengumengameli we-ANC uMnuz Jacob Zuma ohlale isikhathi eside ephethe.
USolwazi Bheki Mngomezulu ongumhlaziyi wepolitiki ozinze eWestern Cape, uthe incwadi kaSteenhuisen iveza imizwa yamanye amalungu eDA ngoba kukhona adla ngoludala nalawo ahambisana nomgqigqo.
“Lawo adla ngoludala afuna kunikezwe amalungu amadala eDA ithuba lokuhola kuthi lawo ahambisana nomgqigqo afune uMaimane azoheha intsha nabamnyama. UMaimane wakhethwa ukuze anxenxe intsha nabavoti abamnyama. Ukwenzile lokho yingakho ephinde waphakanyiswa,” kusho uMngomezulu.
Uthe kuyakhathaza okwenzeka kwiDA ngoba kuhlala obala ukungaboni ngaso linye phakathi kwabamhlophe nabamnyama.
“Kuyacaca ukuthi abaholi abamnyama bayasetshenziswa ukuthi bahehe abavoti abamnyama nentsha ngoba noNksz Lindiwe Mazibuko wahamba sekumuncu nakhu manje banyakazisa uNkk Patricia De Lille, ngeke asale ngaphandle noMaimane,” kusho uMngomezulu.
Uveze ukuthi naseThekwini umholi weDA uMnuz Zwakele Mncwango ukhalile ngokukhethwa kobuholi obumhlophe bodwa esho nokuthi kufanele kube khona zonke izinhlanga ebuholini obuphezulu beDA.
Mayelana nodaba lokuthi kunamagatsha asemalokishini angeke avunyelwe ukuya engqungqutheleni, uMngomezulu uthe ngebhadi uma kuzoba nengqungquthela kazwelonke akusiwo wonke amagatsha aya kuyo ngisho kwi-ANC kuye kucwaningwe ukuthi igatsha lisesimeni esinjani.
“Ukungavunyelwa kwamagatsha ukuthi aye engqungqutheleni kwenzeka kuwo wonke amaqembu epolitiki. Ngebhadi kungase kwehlise isibalo sabantu abaseka abaholi abamnyama abasekwa kakhulu elokishini. Kunikeza abamhlophe abalandeli abaningi. Bekungakuhle ukuthi uSolly Msimanga abe nguSihlalo weFederal Council okuyisikhundla asibanga no-Athol Trollip. Phela iFederal Council igcwele kakhulu abamhlophe,” kusho uMngomezulu.
Omunye umhlaziyi wepolitiki ozimele, uMnuz Thabani Khumalo, uthe kunoqhekeko kwiDA oluhambisana nokucwasana ngokobuhlanga.
“I-DA iya engqungqutheleni kazwelonke ibhekene nenkinga yoqhekeko oluhambisana nobuhlanga lapho abaholi abamnyama befuna iqembu libe nazo zonke izinhlanga kodwa abamhlophe abayizwa kahle le nto. USolly Msimanga ungene ngamabomu embangweni kaFederal Chair. Asazi-ke ukuthi uzophumelela yini ngoba kusekhona abamhlophe abafuna kube nabaholi abamhlophe kwiDA,” kusho uKhumalo.
Uthe iDA kufanele iluphathe ngobunono udaba lwamagatsha asemalokishini ngoba ukungavunyelwa kwawo ukuthi aye engqungqutheleni kusho ukuthi abaholi abavela emalokishini bazongena sebexhugela benabalandeli abancane.
“UMaimane wayenikwe umyalelo wokufaka iDA ebantwini wayifaka yingakho isigcwele emalokishini. Uma sekuthiwa abantu basemalokishini abavumelekile engqungqutheleni kuthanda ukuba nzima ngoba kwenza iDA kube sengathi ayizazi ukuthi ifunani,” kusho uKhumalo.