Sekusungulwe iqembu elisha elihlubuke kwiNFP
I-NFP izoya okhethweni lukazwelonke ngonyaka ozayo ixhugela ngemuva kokuthi sekukhona elinye iqembu elihlubuke kuyona elisungulwe ngabanye abaholi abake baba yizithenjwa zikaNkk Zanele Magwaza-Msibi.
Leli qembu elisha iNational Peoples Front (NAPF) eselibhalisiwe nakwa-IEC limataniswa noMnuz Bheki Gumbi oke waba nguSihlalo weNFP, eGoli.
Ngokuthola kwaleli phephandaba, uGumbi nguyena osekhaleni ekusungulweni kweNAPF.
Ethintwa uGumbi izolo uphike wama ngentaba ukuthi kukhona ulwazi analo ngokusungulwa kweqembu elisha. “Nami ngiyayizwa inkulumo ethi engathi kuneqembu elihlubuke kwiNFP elisungulwa ngamalungu enhlangano anganeme ngesimo seqembu ngemuva kokugula kukaMengameli uNkk Zanele Magwaza-Msibi,” kusho uGumbi.
Uthe kungenzeka ukuthi lezi zinsolo ziyiqiniso ngoba baningi abantu abanovalo ngekusasa leNFP.
“Nami ngingomunye wabantu abakhathazekile ngesimo seqembu, abantu abaningi bathuke kakhulu ngekusasa leqembu ngemuva kokubuyiswa kwabaholi abebexoshiwe benhlangano uMnuz Maliyakhe Shelembe noSolwazi Nhlanhla Khubisa abebesolwa ngokudicilela iqembu phansi ngokuhluleka ukuqinisekisa ukuthi liyalungenela okhetho lohulumeni bezindawo ngo-2016,” kusho uGumbi.
Uthe amalungu amaningi anovalo lokuthi ukubuya kwalaba baholi kuzophazamisa imizamo ebiyenziwa yokuzama ukuhlenga iqembu.
“Iqembu lezombusazwe liphilela izinto ezintathu. Okokuqala ukungenela ukhetho, linqobe bese liba nguhulumeni noma iqembu eliphikisayo. Uma ukhetho lungasalingeneli kusho ukuthi ikusasa lalo alikho,” kusho uGumbi.
UMnuz Canaan Mdletshe okhulumela uNkk MagwazaMsibi uthe kuningi abakuzwayo okubalwa nakho ukusungulwa kweqembu elisha okuthiwa lihlubuke kwiNFP.
“Siyayizwa leyo nkulumo kodwa ngeke size siphawule ngezinto esizizwa zikhulunywa emgwaqweni,” kusho uMdletshe. Ukusungulwa kweNAPF kusho ukuthi asemabili amaqembu ahlubuke kwiNFP ngemuva kokusungulwa futhi kwe-Academic Congress Union (ACU) esungulwe nguMntwana uMzonjani Zulu naye oke waba yisethenjwa sikaNkk Magwaza-Msibi. I-ACU ingenele ukhetho lohulumeni basekhaya ngo-2016, yakwazi ukuzuza amakhansela amathathu e-Eastern Cape.