Kutholwe isidumbu sowesifazane silahliwe
USADIDEKILE umndeni nomphakathi waseMhlangane, eMuden ngaphandle kwaseGreytown ngokubulawa kowesifazane, isidumbu sakhe silahlwe emgwaqweni.
UNksz Thanda Qoma (23), obebuye asebenzise isibongo sakwaMyaka, utholwe eshayiwe, enenxeba ekhanda elahlwe emgwaqweni ngoMgqibelo.
Lo wesifazane onezingane ezimbili ezisencane, akukapheli inyanga kushone umfowabo uMnuz Nana Qoma (27) owahlaselwa wumngani wakhe elele ekameleni lakhe, wamgwaza.
Okwenze kudideke umndeni nomphakathi yingoba kungaziwa ukuthi lesi sigameko sihlobene yini nokubulawa kukamfowabo.
Umsolwa ecaleni likamfowabo, watholwa ezilengisile khona kule ndawo ngemuva kokukhishwa enkantolo ngebheyili.
Udadewabo kaNksz Qoma, uNksz Sibongile Qoma uthe uphithene ikhanda.
“Angazi ngempela ukuthi kungani udadewethu ebulewe. Uhambe ekhaya ngoLwesihlanu eya eMuden ezitolo. Akabange esabuya, kufike amaphoyisa ethi utholwe ebulewe. Intombazane akade ehamba nayo isho izinto ezingahlangani. Iqale yathi bebecele ukugibela kwenye imoto, yaphinda yathi bebegibele imoto yesoka likadadewethu, esingalazi. Uthe udadewethu uphume imoto ihamba. Yena waqhubeka wahamba nale moto, yamehlisa kwenye indawo. Uma kuhlolwa isidumbu sikamufi kuthiwa ushayiwe njengoba enengozi ekhanda. Konke lokhu kusenza singazi ukuthi kwenzakani ngoba akukapheli nenyanga kubulewe umfowethu. Sididekile kakhulu okwamanje,” kusho uNksz Qoma.
NgoMsombuluko kuvele ukuthi le ntombazane eyayihamba nomufi ibisathathwe ngabaphenyi, beyoyihloma imibuzo.
Okhulumela amaphoyisa KwaZulu-Natal, uColonel Thembeka Mbele ukuqinisekisile ukuthi kuvulwe icala lokubulala esiteshini saseMuden kulandela ukutholwa kwesidumbu sowesifazane oshayiwe, washona. Uthe akekho osaboshiwe kodwa uphenyo lwamaphoyisa luyaqhubeka.
UMnuz Thandanani Lembethe weCommunity Policing Forum (CPF) eMuden uthe bakhathazekile ngokushona kwabantu belandelana ngale ndlela. Uthe kade beba nemihlangano ukuzama ukuvala izindawo zokucima ukoma ezivulwa kuze kuse, bese kusuka izigameko eziholela ekubulaweni kwabantu. Umufi nomfowabo naye owabulawa kusolwa ukuthi behlelwa yilo mshophi besuka kwenye indawo yokucima ukoma endaweni.