Ingwadla yabazali bezingane ezine-autism
ABAZALI bezingane ezine-autism basazithola belahliwe ngenxa yokuthi azamukelwa ezikoleni. Yize kukhona izikole zezingane ezinokukhubazeka, akuzona zonke ezamukela izingane ezineautism . Inhlangano i-Autism South Africa isiqale umkhankaso wokuzama ukusiza abazali abanenkinga zokungazitholi izikole. Ekhasini leFacebook lale nhlangano, abazali baveze intukuthelo yabo ngokunganakwa kwezingane ezi ezine-autism. Bakhala ngokungazitholi izikole, abanye bathi bafakwa ohlwini lwabalindile, bagcine bengazitholile izikhala. Owesifazane waKwaZulu-Natal onengane eneminyaka engu-10, uthe usephoqeleke ukuyihlalisa ekhaya ngoba ayamukelwa. Uthi wagqigqa ezikoleni engalutholi usizo, bemtshela ukuthi bathatha izingane ezijwayelekile.
Abazali bahlukene phakathi, abanye bathi akumele ziye ezikoleni. Omunye obhale kuleli khasi uthe akakukhuthazi ukuthi izingane zifakwe ezikoleni ngoba abafundisa khona abaqeqeshekile ukubhekana nezingane ezine-autism. Uthe ingane yakhe eneminyaka engu16 wayifunela ozoyigada ekhaya ukuze ingahlukunyezwa ngezinye izingane ngoba zingasiqondi isimo sayo.
UNkk Sandy Klopper onguMqondisi we-Autism South Africa, uthe abakuleli abakasiqondi lesi simo. Uthe kumele kufundiswe zinyanga zonke ngaso, hhayi uma kunomkhankaso kuphela.
“Abantu abasiqondi lesi simo. Sithola izingcingo nsuku zonke abazali bekhononda ngokungazitholi izikole,” kusho uNkk Klopper.
Kuthiwa okwenza i-autism ingaqondakali, wukuthi ivela ngezindlela ezahlukene. Ezinye izingane zithatha kancane ngokomqondo, ezinye zibe nodlame zingakwazi nokudlala nezinye. Lokhu kwenza ziphile zodwa, zingakwazi ukuphila impilo ejwayelekile yokudlala nezinye izingane.
Kuthiwa zingaphezu kuka-7 000 izingane ezizalwa zinalesi simo ngonyaka.
Ukujabulisa izingane ezineautism, isitolo samathoyizi iToy Kingdom, sizokwenza i-Autisim Hour kusasa kusukela ngo-9 ekuseni. Kuzonikezwa amathoyizi izingane ezine-autism ukuzijabulisa esitolo eSandton, eCanal Walk eCape Town naseBallito. Kuzobe kunabasebenzi abaqeqeshiwe ukubhekana nezingane ezinaso, bazinikeze namathoyizi eziwafanele.