Isizwe sisalila ngokuwa kweqhawekazi
ISIZWE siyalila, silila kufanele kuwe iqhawe uNkk Winnie Madikizela-Mandela ongomunye wababumbi bomzabalazo wenkululeko. Ngenkathi kuqinisekiswa izindaba zokuthi usedlulile emhlabeni uNkk Madikizela-Mandela ngoMsombuluko, aphume nxa zonke amazwi enduduzo, abanye bezwakalisa ukushaqeka, ubuhlungu, abanye babungaza impilo yaleli qhawe.
INingizimu Afrika namhlanje ikhululekile nje yingenxa yamaqhawe adela konke. Ungomunye wabahlukumezeka ngesikhathi esinzima sobandlululo njengoba amaphoyisa ayehlale ehlasela ngesankahlu emzini wakhe efuna owayengumyeni wakhe uMnuz Nelson Mandela.
Kuthe noma eseboshiwe uMandela amaphoyisa abesaqhubeka nokumhlukumeza nokwaphetha ngokuthi naye aboshwe njengoba wayeyisishoshovu. Ngenkathi iNingizimu Afrika ingena embusweni wentandoyabantu, kwiKhomishini yamaQiniso nokuBuyisana kwavela isithombe esingesihle ngoNkk MadikizelaMandela nokwaholela ekutheni bagcine behlukanisile noMandela.
Nangemuva kwalezo zinkinga akazange atheneke amandla waqhubeka nokuzinikela kwezembusazwe ehola i-ANC Women’s League. Yize iminyaka ibisihambile nokugula kumxina kepha ubesaba nalo izwi kwezepolitiki futhi ehlonishwa.
Impilo kaNkk Madikizela-Mandela ibe nezifundo eziningi ezisengasiza nathi esisaphila ukuba ngabantu abangcono.
Ukutshengisile ukuthi kumele uzinikele futhi ubekezele ukuze kufezeke lokho okuhlosile.
Ukonakala kwegama lakho nokuvela kwamahlazo akho makungasho ukuthi sekumele uphele amandla ungakwazi ukufeza umsebenzi owumiselwe.
Utshengisile ukubaluleka kokwazisa nokuthanda umndeni.
Ube yisibonelo nakwabesifazane sokuthi kumele uhlale uzithanda njengoba kuze kwaba sekupheleni kwempilo yakhe ebelokhu emuhle, ezicwala futhi ehlanzekile.
Nakwezenkolo ubaziwa njengoba ebeyilungu eliqavile leMethodist Church of Southern Africa.
Imisebenzi yakhe siyibonile, ukulwile ukulwa okuhle.
Lala kahle Mama Nomzamo Winifred, qhawe lamaqhawe!