Izinqumo okumele uzithathe ukuze ezezimali zingakuxaki
SITSHALA NONGUBENI WEZIMALI
KUBALULEKILE ukuzilungiselela ngokuthatha izinqumo mayelana nezezimali ngoba izimo zempilo ziba nomthelela kwezezimali zakho. Ngabe uyashada, uthenga umuzi wakho wokuqala noma uqala umsebenzi omusha, uzoba nokukhathazeka ngokuthi zizoba namthelela muni lezi zinguquko empilweni yakho nasephaketheni lakho. Nazi izinqumo okumele uzenze ngempilo yakho ukuze ezezimali zakho zibe sesimeni esikahle.
1. Ngabe wenza msebenzi muni?
Sonke siyayithanda ingcebo kepha umbuzo uthi, ngabe uyizuza kanjani ingcebo? Lokhu kuqala ngokuba nomsebenzi oyimpumelelo kanti lokhu kulele kwikhono nethalente lakho. Umsebenzi wakho uyinjini yomcebo wakho. Uma uhola kakhulu izinto zibalula ngasezimalini. Uwona khiye ekwakheni umnotho. Impilo yakho yonke uyichitha uguqula ithalente nekhono lakho libe yimali. Uyakwazi ukukhuphula imali oyitholayo, ngokuqhubeka nokuzithuthukisa ngemfundo noma ukhushulelwe esikhundleni emsebenzini okuholela ekukhushulweni kweholo.
2. Ngabe ushada umuntu okulungele?
Abantu abahlangabezana nezinkinga ebudlelwaneni okanye emshadweni bavame ukuthi bakhale ngemali njengesizathu sezinkinga. Kusemqoka ukudalula isimo sakho sezimali kumlingani wakho ngaphambi kokushada, yize kungalula. Lesi yisikhathi sokudalula izikweletu zakho nezinye izindlela owenza ngazo imali, imali oyitshalile noma impahla. Bathi indlela esheshayo yokulahlekelwa yimali, isehlukaniso kanti enye eyokushada umuntu ongayihloniphi imali.
3. Izindleko zomuzi uma uqhathaniswa neholo lakho
Enye yezindlela zokumosha imali wukuthenga umuzi ongakwazi ukuwukhokhela. Enye yezinto engukhiye kwezezimali zakho, izindleko zakho zokuphila. Lapha sikhuluma ngezindleko zansuku zonke ongakwazi ukuzigwema uma unomuzi njengokukhokhela isikweletu somuzi, amanzi, ugesi, ukulungisa umuzi nomshwalense womuzi. Uma izindleko zisezingeni eliphansi kuba lula ukulondoloza imali. 4. Unazo izingane? Ukukhulisa izingane akulula kanti kuyadla ephaketheni. Kumele ube nohlelo lwezimali elinozinzo ukuqinisekisa ukuthi izingane ziphila impilo enethezekile. Ungaqhathanisa ukukhulisa izingane njengesikweletu somuzi sesibili. Isizathu salokhu ngukuthi, ukukhulisa ingane kuyisibophezelo sesikhathi eside, nesiphela uma sebekwazi ukuzimela ngokwezezimali. Ucwaningo luthi eNingizimu Afrika kuthatha imali elinganiselwa kuR90 000 ukukhulisa ingane ngonyaka.
5. Ngabe unahlobo luni lwemoto?
Ukuthenga imoto ngenye yezinqumo ezinkulu kakhulu ngokwezezimali. Uma kuziwa ekuthengeni imoto amaphupho akho, izeluleko esiphusile ngukuthenga imoto elingana nephakethe lakho.
6. Ngabe uqale nini ukulondoloza imali?
UWarren Buffet wabhala wathi: “Ungalondolozi imali, emva kokuyisebenzisa kodwa usebenzise imali emva kokuyonga.” Imali oyisebenzisayo iyona eyinkomba ngemali ongayilondoloza. Uma usemncane ngokweminyaka, usuke usanesikhathi esiningi sokonga imali, ukhulise nomnotho wakho. Izibalo ezisemqoka zithi, uma uneminyaka engu-23 ulondoloza imali elinganiselwa kuR6000 minyaka yonke; eminyakeni engu-10 enenzalo ka-8% ulondoloza imali elinganiselwa kuR93 873. Uma emva kweminyaka engu-10 uyeka ukulondoloza uze ubenemnyaka engu-60, utshalomali lwakho ngabe selukhule laba nguR749 863. Umuntu olinda aze abeneminyaka engu33 ukulondoloza imali, bazodinga ukulondoloza imali elinganiselwa kuR7 950 iminyaka engu-27, ukuze ulondoloze imali enguR749 863 usuneminyaka engu-60.
7. Ngabe unaye umeluleki wezezimali?
Awumdingi umeluleki wezezimali uma ukwazi ukuphatha imali, unohlelo nolwazi ngezezimali. Kepha ngenxa yokuthi izimpilo zethu zinezinto eziningi ezenzakalayo, kungenzeka ukuthi uludinge usizo lomeluleki wezezimali ogunyaziwe. NgokukaBenjamin Graham, isitha somtshalimali ngumtshalimali uqobolwakhe, ngoba banemizwa kanti izinqumo abazithathayo ziyaye zeluswe imizwa, yingakho kusemqoka ukuba nomeluleki obhekelela ezezimali ngokuzimela.
Ukuxhumana neInkunzi Wealth Group sishayele ku-087 1600 018, noma kuma-emails: invest@ iwgsa.co.za