ULe Soul uthi amaciko awazimakethe ayeke ukuqhosha nganakho
UMSAKAZI weGagasi FM ophinde abe nguDJ wasezindaweni zobumnandi, uDJ Le Soul, weluleke abantu ngokuthi kumele bakhangise ngemisebenzi yabo ezinkundleni zokuxhumana kunokugabisa ngezinto abanazo.
ULe Soul wethula uhlelo iMidday Shandis ngokubambisana noFelix Hlophe noFlymotion njalo ngo-12 kuya ku-3 emini phakathi nesonto. Muva nje ubeseMiami eyothamela inkundla yokucobelelana ngolwazi kwezomculo yaminyaka yonke, iMiami Music Conference.
“Ngesikhathi ngifika bengibhala ukuthi ngikuphi. Abantu bangale bavele bangibuza ukuthi ngingakuphi, kusukela kubathwebuli kuya kubahleli bemicimbi.
“Ngagcina sengiqashwa emicimbini emine ukuthi ngiyodlala khona,” kusho uDJ Le Soul.
Uqhube wathi: “Ibhizinisi ezinkundleni zokuxhumana yilona elibalulekile.
“Abantu kumele bazi kakhulu ngomsebenzi wakho hhayi ukubaqhoshela ngezinto osunazo.”
Uthe uyabuyela maduze phesheya kwezilwandle ngoba abakhona bawulambele umculo wakuleli.
“Bathanda kakhulu igqom’ ngoba yinto entsha kubo futhi yehlukile. UBlack Coffee uyifakile i-Afro House.”
ULe Soul kulezi zinsuku umatasa uphusha i-albhamu yakhe yokuqala i-Unorthodox Sounds enezingoma eziyisishiyagalolunye. Kuyo upike abantu abehlukene okubalwa uLungi, Freeman, Triggger, Bizzer noButter.
“Ngibheke ukuthi ngiyiphushe kuze kuphele unyaka.
“Angiziboni ngikhipha kulo nyaka nangozayo, ngiyayethemba ukuthi iseqophelweni eliphezulu.”
Uveze nokuthi weneme ngohlelo lwabo emsakazweni ngoba nesibalo sabalaleli siyakhula kwazise sebenabalaleli abalinganiselwa ku-943 000.