U-DJ Boonu nengoma entsha sha
UZISHAYA isifuba ngokusebenza noNtando Duma owadalula ukuthi akazimisele ngokungena agamanxe emculweni uDJ waseThekwini, uBoonu, okhiphe ingoma entsha ethi Abangani Bami.
UNtando, ozakhele udumo ethula izinhlelo ku-e.tv futhi elingisa kwiRhythm City, wayeshisa izikhotha ngoDisemba ngengoma ethi Jaiva Phezu Kombhede ayeyicula noBabes Wodumo.
Ekuqaleni konyaka utshele Isolezwe ukuthi akaziboni eba ngumculi.
U-Andile “DJ Boonu” Chili waseMlaza nokho ukwazile ukumshintsha umqondo njengoba ethi kunezingoma ezimbili abazenzile.
“Angithi mina ngiyisoka. Ngisebenzise ubusoka ngakwazi ukumjika
umqondo. Ngixhumane naye ngamchazela,” kusho uDJ Boonu.
Ngaphandle kukaNtando, uphinde wapika noMadanon, Duncan kanti umculi kamaskandi uJaiva Zimnike udlala isigingci. Itholakala ezitolo zomculo ze-internet njenge-iTunes.
Ngonyaka odlule uBoonu ukhiphe ingoma eyayithandwa ngabaningi ethi Uswidi Wodwa ayepike kuyo Igcokama Elisha noMadanon.
“Isitayela sokusebenza nabaculi bakamaskandi ngisiqale ngoba ngifuna ukuqhamuka nento ehlukile. Angifuni kuthiwe uzenza bani. Yingakho futhi uma ngidlala ungizwa ngidedela umaskandi, igqom’ nekwaito.”
Uthe ingoma yakhe ikhuluma ngokuhlonipha abantu besifazane ngokuthi uma abantu besilisa bethenge iziphuzo akusho ukuthi kumele bahambe nabo.
UBoonu uveze ukuthi uzozwa ngomphakathi ukuthi ayikhiphe yini i-albhamu ephelele.
“Ikhona enye ingoma engiyenze noNtando nomculi wase-Afrika engingeke ngimdalule. Ngizolandelisa ngayo,” kusho uBoonu.
Lo DJ uqale ukudijeya ngo2009 kanti ngo-2011 ubenguDJ weBig NUZ. Waqala ephethe onogada eMangosuthu University of Technology ejwayele ukubuka
abanye bedlala.